ۋكراين پرەزيدەنتىنىڭ ايتۋىنشا پۋتين ۋكراين حالقىنىڭ "ورىس الەمىنىڭ" ءبىر بولشەگى ەمەسىن قابىلداعىسى كەلمەيدى.

زەلەنسكيي بۇل تۋرالى NOS تەلەارناسىنا بەرگەن سۇحباتىندا ايتتى دەپ حابارلايدى Dalanews.kz. 

كييەۆتى "ورىس الەمىنىڭ" اجىراماس بولشەگى دەپ پايىمداعان پۋتين وڭباي قاتەلەسكەن. ۋكراينانى ەكى-ۇش كۇننىڭ ىشىندە جاۋلاپ الۋدى كوزدەگەن كرەمل "جەرگىلىكتى حالىق ورىس باسقىنشىلارىن قۇشاق جايا قارسى الادى" دەپ توپشىلاعان.

"پۋتين شاپقىنشىلىعى ۋكراين حالقىنىڭ اشۋ-ىزاسىنا ءتيدى. كۇللى ەل اگرەسسورعا قارسى ءدۇر كوتەرىلدى. "ورىس الەمى" دەيتىن توتاليتارلىق جۇيەنىڭ شاڭىراعى شايقالىپ تۇر. كسرو-نىڭ شەكپەنىنەن شىققان ەلدەردى تۇگەلدەي وسى كەڭىستىككە كىرگىزىپ جىبەرگەن ماسكەۋدىڭ بەتى قايتىپ، ارىنى باسىلىپ قالدى. ايتسە دە سۇيەككە سىڭگەن ادەتىنەن ارىلا الماي ءجۇر.

پۋتين ۋكراينانى "ورىس الەمىنىڭ" ءبىر پۇشپاعى دەپ سانايدى. كييەۆتىڭ كرەملدەن الدەقاشان تەرىس اينالعانىن، ورىستىڭ قۇندىلىقتارىن ءسىپىرىپ-سۇيىرىپ كۇرەسىنگە لاقتىرعانىن قابىلداعىسى كەلمەيدى. وسى وي اقىر سوڭى ءپۋتيننىڭ تۇبىنە جەتەدى"، – دەيدى زەلەنسكيي.

ونىڭ ايتۋىنشا كرەمل باسشىسى رەسەيدىڭ ارمياسىن اسىرا باعالاپ جىبەرگەن. جەر جاعدايىن بىلمەيتىن، اسكەري تەحنيكاسى سوناۋ سوۆەت داۋىرىنەن بەرى جاڭارماعان، جەمقورلىققا شىلانعان ورىس اسكەرى ۋكراين جەرىندە قويشا قىرىلعان.

"ورىس الەمى" دەيتىن كونسەپسيانىڭ الدەقاشان سۇيكىمى كەتكەن. ۋكراين حالقى ورىس الەمىنەن اۋلاق جۇرگەندى قالايدى. ولاردىڭ وي-ورەسى، تانىم-تالعامى ورىستىڭ پاتشانى ءپىر تۇتاتىن قۇلدىق ساناسىنان بيىك تۇر.

ءسوي دەگەن زەلەنسكيي:

"ۋكراين حالقى ەشكىمگە سوقتىقپاي، ءوز ەلىندە ەمىن-ەركىن ءومىر سۇرگىسى كەلەدى. بوگدە ەلگە باسىپ كىرگەن ءپۋتيننىڭ كوزىن شەل باستى ما، ايتەۋىر ءوز اسكەرىنىڭ الەۋەتىن شىنايى باعالاي المادى. ۋكراين جەرىندە قازا تاپقان ورىس وككۋپانتتارىنىڭ سانىندا ەسەپ جوق"، – دەيدى زەلەنسكيي.

...

ونىڭ پىكىرىنشە ۋكراينا 2014 جىلدان بەرى سوعىس جاعدايىندا ءومىر كەشىپ كەلەدى. سول كەزدەن بەرى جينالعان تاجىريبەنىڭ ارقاسىندا پۋتين شاپقىنشىلىعىنا توتەپ بەرگەن. سويتە تۇرا باتىس ەلدەرىنىڭ ءبىرازى كييەۆتىڭ باسقىنشىنىڭ بەتىن قايتارارىنا كۇمانمەن قاراعان.

"كرەملدىڭ كۇندەردىڭ - كۇنى شەكارا شەبىمىزدى بۇزىپ، باسىپ كىرەرىن ءبىلىپ جۇردىك. اگرەسسور كەز-كەلگەن ۋاقىتتا ازۋىن باتىرۋى مۇمكىن ەدى. اقش-تىڭ بارلاۋ قىزمەتى شەكارا ماڭىنداعى حالىقتى ەلدىڭ باتىس وڭىرىنە كوشىرۋدى ۇسىندى، ال اسكەرگە جاپپاي وكوپ قازۋعا كەڭەس بەردى. ولار بىزگە سەنگەن جوق، ۋكراينانىڭ تاباندىلىق تانىتارىنا كۇمانمەن قارادى"، – دەيدى زەلەنسكيي.

كييەۆ باتىستىڭ ۇسىنىسىنان باس تارتقان، سەبەبى ەل ىشىندە الاساپىران تۋعىزۋدى قالاماعان. بۇيتەر بولسا ۋكراين ەكونوميكاسى كوپكە ۇزاماي كۇيرەپ تىنار ەدى. ۇلتتىق ۆاليۋتا كۇرت قۇلدىراپ، شەتەلدىك كومپانيالار ەلدەن كەتۋگە اسىعار ەدى.

زەلەنسكييدىڭ ايتۋىنشا، بۇل شەشىم اقىر سوڭى ءوزىنىڭ دۇرىستىعىن دالەلدەگەن.