Ortalyqtyń ashylý rásimine aýdan ákimi Baǵlan Batyrshaev, aýdandyq máslihat hatshysy Qasymbai Ábdihalyq, ardagerler men aýdan turǵyndary qatysty.
– Búgin qazynaly qarttarymyz ben múgedek azamattarymyzǵa qolaily jaǵdai jasaý maqsatynda aýdan ortalyǵy – Temirlanda «Shapaǵat» áleýmettik qyzmetter kórsetý ortalyǵy ashylyp otyr. Barshańyzdy jańa ortalyqtyń ashylý rásimimen shyn júrekten quttyqtaimyn. Kóńilge túigeni kóp qarttarymyzǵa qolaily jaǵdai jasaý – barshamyzdyń mindetimiz. Sondyqtan abyz aqsaqaldarymyzdyń kúndelikti demalysyna arnap berilgen ortalyqtyń esigi ár kez ata-ájelerimizge ashyq bolady. Júrip, turýy qiyn, qoǵamnyń, ainalanyń kómegine muqtaj azamattarǵa da teń qoǵam qalyptastyrý maqsatynda atalǵan ortalyq qyzmet kórsetedi dep senemin. Endeshe, jańa ǵimarattyń ishinde tek qýanyshty kúnder men jaqsylyǵy mol sátter kóp bolsyn! – dedi aýdan ákimi óz quttyqtaýynda.
Mekeme quramyndaǵy «Teń qoǵam» jáne «Ardagerler ortalyǵy» aýdanda esepte turatyn 5478 múgedektigi bar azamat pen 11 myńǵa jýyq zeinetkerlerge arnaýly áleýmettik qyzmetter kórsetýmen ainalysady.
Qarttar men múgedek azamattardyń igiligi úshin paidalanýǵa berilgen ortalyq jumysymen tanysqan aýdan basshysy Baǵlan Dánebekuly zaman talabyna sai jabdyqtalǵan ǵimarattyń aýdan turǵyndaryna qolaily jaǵdai jasaityndyǵyn aityp ótti.
«Teń qoǵam» ortalyǵy jartylai statsionarlyq jaǵdaidaǵy psihonevrologiialyq aýytqýlary bar, tirek qimyl apparaty buzylǵan múgedekter men 1,5 jastan 18 jasqa deiingi múgedektigi bar balalarǵa táýliktiń kúndizgi 4 saǵat ýaqytynda eki aýysym boiynsha qyzmet kórsetedi. Sonymen qatar múmkindigi shekteýli jandarǵa meditsinalyq emes saýyqtyrý sharalary, psihologiialyq kómek kórsetý arqyly turmystyq jáne áleýmettik daǵdylarǵa beiimdeidi.
Sondai-aq, atalǵan ortalyq 18 jastan asqan múgedekterge, birinshi jáne ekinshi toptaǵy múgedekterge áleýmettik qyzmetter portaly arqyly jeke ońaltý baǵdarlamasyna sáikes estý apparattary, qolarba, jórgekter men tósenishter jáne taǵy basqa 55 tehnikalyq ońaltý quraldaryn alýǵa, tańdaýǵa kómek kórsetip, jumysqa ornalasýyna, qujattaryn rásimdeýge járdemdesedi jáne quqyqtyq, psihologiialyq kómekter usynady.
«Ardagerler ortalyǵynda» egde jastaǵy zeinetkerler men aǵa býynnyń ómir saltyn jaqsartyp, sportpen shuǵyldanyp, salaýatty ómir saltyn ustanýǵa, densaýlyǵyn nyǵaitý maqsatynda belsendi mádeni, shyǵarmashylyq, sporttyq sharalar uiymdastyrylady. Ár 15 kún saiyn eki aýsymda 20 adamnan aiyna 40 azamatqa áleýmettik jáne meditsinalyq saýyqtyrý qyzmetteri kórsetiledi.
Aýdan kóleminde turmystyq zorlyq-zombylyqtan japa shegip daǵdarysqa ushyraǵan jábirlenýshilerge arnaýly áleýmettik psihologiialyq qyzmetter kórsetiledi.
Aita keterligi, ortalyqta biliiard, tennis stoly, túrli jattyǵý quraldary, kitap oqý alańy, shahmat, toǵyzqumalaq, doiby oiyndarymen shuǵyldanýǵa múmkindik bar. Jan saýlyǵyna birden bir em bolatyn tuzdy shahta iske qosylǵan.
