ورتالىقتىڭ اشىلۋ راسىمىنە اۋدان اكىمى باعلان باتىرشايەۆ، اۋداندىق ءماسليحات حاتشىسى قاسىمباي ءابدىحالىق، ارداگەرلەر مەن اۋدان تۇرعىندارى قاتىستى.
– بۇگىن قازىنالى قارتتارىمىز بەن مۇگەدەك ازاماتتارىمىزعا قولايلى جاعداي جاساۋ ماقساتىندا اۋدان ورتالىعى – تەمىرلاندا «شاپاعات» الەۋمەتتىك قىزمەتتەر كورسەتۋ ورتالىعى اشىلىپ وتىر. بارشاڭىزدى جاڭا ورتالىقتىڭ اشىلۋ راسىمىمەن شىن جۇرەكتەن قۇتتىقتايمىن. كوڭىلگە تۇيگەنى كوپ قارتتارىمىزعا قولايلى جاعداي جاساۋ – بارشامىزدىڭ مىندەتىمىز. سوندىقتان ابىز اقساقالدارىمىزدىڭ كۇندەلىكتى دەمالىسىنا ارناپ بەرىلگەن ورتالىقتىڭ ەسىگى ءار كەز اتا-اجەلەرىمىزگە اشىق بولادى. ءجۇرىپ، تۇرۋى قيىن، قوعامنىڭ، اينالانىڭ كومەگىنە مۇقتاج ازاماتتارعا دا تەڭ قوعام قالىپتاستىرۋ ماقساتىندا اتالعان ورتالىق قىزمەت كورسەتەدى دەپ سەنەمىن. ەندەشە، جاڭا عيماراتتىڭ ىشىندە تەك قۋانىشتى كۇندەر مەن جاقسىلىعى مول ساتتەر كوپ بولسىن! – دەدى اۋدان اكىمى ءوز قۇتتىقتاۋىندا.
مەكەمە قۇرامىنداعى «تەڭ قوعام» جانە «ارداگەرلەر ورتالىعى» اۋداندا ەسەپتە تۇراتىن 5478 مۇگەدەكتىگى بار ازامات پەن 11 مىڭعا جۋىق زەينەتكەرلەرگە ارناۋلى الەۋمەتتىك قىزمەتتەر كورسەتۋمەن اينالىسادى.
قارتتار مەن مۇگەدەك ازاماتتاردىڭ يگىلىگى ءۇشىن پايدالانۋعا بەرىلگەن ورتالىق جۇمىسىمەن تانىسقان اۋدان باسشىسى باعلان دانەبەك ۇلى زامان تالابىنا ساي جابدىقتالعان عيماراتتىڭ اۋدان تۇرعىندارىنا قولايلى جاعداي جاسايتىندىعىن ايتىپ ءوتتى.
اۋدان اكىمىنىڭ ايتۋىنشا، مەكەمەدە مۇگەدەكتەردى تاسىمالداۋ ءۇشىن ينۆاتاكسي قىزمەتى ىسكە قوسىلعان. مۇنان بولەك، اۋداندىق ورتالىق اۋرۋحانامەن بىرلەسە وتىرىپ، ورتالىق قىزمەتىنە جۇگىنگەن ازاماتتارعا ءتۇرلى مەديسينالىق كومەك كورسەتىلمەك.
«تەڭ قوعام» ورتالىعى جارتىلاي ستاسيونارلىق جاعدايداعى پسيحونيەۆرولوگيالىق اۋىتقۋلارى بار، تىرەك قيمىل اپپاراتى بۇزىلعان مۇگەدەكتەر مەن 1،5 جاستان 18 جاسقا دەيىنگى مۇگەدەكتىگى بار بالالارعا تاۋلىكتىڭ كۇندىزگى 4 ساعات ۋاقىتىندا ەكى اۋىسىم بويىنشا قىزمەت كورسەتەدى. سونىمەن قاتار مۇمكىندىگى شەكتەۋلى جاندارعا مەديسينالىق ەمەس ساۋىقتىرۋ شارالارى، پسيحولوگيالىق كومەك كورسەتۋ ارقىلى تۇرمىستىق جانە الەۋمەتتىك داعدىلارعا بەيىمدەيدى.
سونداي-اق، اتالعان ورتالىق 18 جاستان اسقان مۇگەدەكتەرگە، ءبىرىنشى جانە ەكىنشى توپتاعى مۇگەدەكتەرگە الەۋمەتتىك قىزمەتتەر پورتالى ارقىلى جەكە وڭالتۋ باعدارلاماسىنا سايكەس ەستۋ اپپاراتتارى، قولاربا، جورگەكتەر مەن توسەنىشتەر جانە تاعى باسقا 55 تەحنيكالىق وڭالتۋ قۇرالدارىن الۋعا، تاڭداۋعا كومەك كورسەتىپ، جۇمىسقا ورنالاسۋىنا، قۇجاتتارىن راسىمدەۋگە جاردەمدەسەدى جانە قۇقىقتىق، پسيحولوگيالىق كومەكتەر ۇسىنادى.
«ارداگەرلەر ورتالىعىندا» ەگدە جاستاعى زەينەتكەرلەر مەن اعا بۋىننىڭ ءومىر سالتىن جاقسارتىپ، سپورتپەن شۇعىلدانىپ، سالاۋاتتى ءومىر سالتىن ۇستانۋعا، دەنساۋلىعىن نىعايتۋ ماقساتىندا بەلسەندى مادەني، شىعارماشىلىق، سپورتتىق شارالار ۇيىمداستىرىلادى. ءار 15 كۇن سايىن ەكى اۋسىمدا 20 ادامنان ايىنا 40 ازاماتقا الەۋمەتتىك جانە مەديسينالىق ساۋىقتىرۋ قىزمەتتەرى كورسەتىلەدى.
جۇمىس بارىسىندا ورتالىققا كەلۋشى ازاماتتار الەۋمەتتىك قىزمەتكەرلەر، الەۋمەتتىك جۇمىس جونىندەگى ماماندار مەن نيەۆرولوگ، مەدبيكەنىڭ باقىلاۋىندا بولادى. جوسپارعا سايكەس كۇندەلىكتى ماسساجبەن ەم قابىلدايدى.
اۋدان كولەمىندە تۇرمىستىق زورلىق-زومبىلىقتان جاپا شەگىپ داعدارىسقا ۇشىراعان جابىرلەنۋشىلەرگە ارناۋلى الەۋمەتتىك پسيحولوگيالىق قىزمەتتەر كورسەتىلەدى.
ايتا كەتەرلىگى، ورتالىقتا بيليارد، تەننيس ستولى، ءتۇرلى جاتتىعۋ قۇرالدارى، كىتاپ وقۋ الاڭى، شاحمات، توعىزقۇمالاق، دويبى ويىندارىمەن شۇعىلدانۋعا مۇمكىندىك بار. جان ساۋلىعىنا بىردەن ءبىر ەم بولاتىن تۇزدى شاحتا ىسكە قوسىلعان.
