Búgin M.Áýezov atyndaǵy OQMÝ-da «Ult tarihyndaǵy Orbulaq shaiqasy: Uly jeńistiń aqiqaty jáne mańyzy» atty halyqaralyq ǵylymi-teoriialyq konferentsiia ótti. Bul basqosýdyń ereksheligi - qazaq memlekettiliginiń tutastyǵyn saqtaýdaǵy airyqsha oryn alatyn Orbulaq shaiqasy jaily halyqaralyq deńgeidegi ǵylymi jiynnyń óńirde alǵash ret ótýi.
Plenarlyq májiliske qatysqan moderatorlar: Sh.Ýálihanov atyndaǵy Tarih jáne etnologiia institýtynyń direktory Z.Qabyldinov pen «Jeti jarǵy jáne Qojabergen jyraý» halyqaralyq qaiyrymdylyq qorynyń tóraǵasy B.Turǵaraev.Sondai-aq, Samarqand memlekettik ýniversitetiniń professory E.Mýsýrmanov, I.Arabaev atyndaǵy Qyrǵyz memlekettik ýniversitetiniń rektory T.Abdyrahmanov, Q.Jubanov atyndaǵy Aqtóbe óńirlik memlekettik ýniversitetiniń professory A.Aitaly, filologiia ǵylymdarynyń doktory M.Myrzahmetov jáne elimizge belgili aqyn-jazýshylar men jýrnalister qatysty.
Jiynda alǵashqy bolyp sóz alǵan Ońtústik Qazaqstan oblysynyń ákimi J.Túimebaev Orbulaq shaiqasynyń mańyzyna toqtaldy.
«Elbasymyz «Tarihty tanyp, zerdeleý kerek, tarihty tarazylaý qajet, sonda taǵdyryńdy, búgingi turpatyńdy tanisyń, keleshegińdi baǵdarlaisyń, aldaǵy júrer jolyńnyń silemin tabasyń» degen bolatyn.
Tarihta erekshe iz qaldyrǵan qazaq halqy úshin azattyq jolynda Uly jeńisterdiń biri jáne biregeii – Orbulaq shaiqasy.
Bul – ulttyq tarihtyń jaýyngerlik dańq shejiresinde erlik pen qaharmandyqtyń jáne otanshyldyqtyń ónegesi bolyp aishyqtalyp qaldy. Búgingi ǵylymi jiyn Orbulaq shaiqasyndaǵy Uly jeńiske 375 jyl tolýyna orai uiymdastyrylyp otyr», - dedi J.Qanseiituly.
Ǵylymi-teoriialyq konferentsiiada Sh.Ýálihanov atyndaǵy Tarih jáne etnologiia institýtynyń direktory Z.Qabyldinov «Orbulaq shaiqasynyń álemdik tarihi mańyzy» atty baiandama jasady.
Sondai-aq, «Ardagerler uiymy» tóraǵasynyń birinshi orynbasary Ó.Ozǵanbaev «Orbulaq shaiqasyndaǵy Uly jeńis jáne rýhani jańǵyrý tarihi sabaqtastyǵy», Samarqand memlekettik ýniversitetiniń professor E.Mýsýrmanov «Samarqand – Registan álemdik órkenniettiń altyn qazynasy. Jalańtós Bahadúrdiń erlik eńbeginiń tarihi mańyzy», I.Arabaev atyndaǵy Qyrǵyz memlekettik ýniversitetiniń rektory T.Abdyrahmanov «Qazaq-Qyrǵyz halqynyń ortaq jaýǵa qarsy turyp kúresýiniń tarihi mańyzy. Qos batyrlar Kóten men Tabai» taqyrybynda baiandama jasady.
Aita keterligi, Orbulaq shaiqasy – qazaq halqynyń jońǵar shapqynshylyǵyna qarsy uzaqqa sozylǵan azattyq soǵystarynyń biri.
Bul 1643 jyldyń jazynda Salqam Jáńgirhan basqarǵan 600 qazaq jaýyngeri men 50 myń jońǵar qolyn basqarǵan Batyr qontaishy arasyndaǵy shaiqas.
Tarihi derekterge súiensek, qazaq jaýyngerleri jońǵardyń 50 myń áskerin Orbulaq tusynda toqtatyp, 10 myń áskerin joiǵan. Keiinnen Jáńgirhanǵa 20 myń qoldy bastaǵan Jalańtós batyr kómekke kelip, oisyraǵan jońǵarlardy keiin sheginýge májbúr etken.
Basqosý sońynda konferentsiiaǵa qatysýshylar arasynda pikir almasý ótip, ǵalymdar tarapynan jasalǵan usynymdar qaraldy.
OQO ákiminiń baspasóz qyzmeti
