Oral mańynda bolǵan aýyr jol apatynan tórt balasyn jalǵyz ózi tárbielep otyrǵan 47 jastaǵy Roman Bondar qaza tapty. Onyń jubaiy byltyr qaitys bolǵan, dep habarlaidy "Moi gorod".
Qaiǵyly jaǵdai 27 shildede Derkól kenti mańyndaǵy ainalma jolda bolǵan. Apatqa úsh kólik qatysqan.
Politsiianyń aldyn ala málimetinshe, Lada Granta júrgizýshisi jol erejesin buzyp, qarsy qozǵalys jolaǵyna shyqqan. Saldarynan ol Volkswagen Golf kóligimen betpe-bet soqtyǵysqan. Keiin sol baǵytta kele jatqan Mercedes-Benz Sprinter shaǵyn avtobýsy Volkswagen kóliginiń artqy bóligine soǵylǵan.
Volkswagen júrgizýshisi Roman Bondar alǵan aýyr jaraqattarynan oqiǵa ornynda kóz jumdy.
Tórt bala ata-anasyz qaldy
Marqum jubaiy qaitys bolǵannan keiin tórt qyzyn jalǵyz tárbielep kelgen. Onyń áieli Olga byltyr qarashada tamaq iship otyrǵanda tunshyǵyp, qaitys bolǵan.
Balalardyń kenjesi toǵyz jasta. Jaqyndarynyń aitýynsha, Roman otbasyn asyraý úshin birneshe jerde jumys istegen.
Otbasynyń týysy Svetlana Vitenbek apat bolǵan kúni Romannyń Derkólden qalaǵa qarai kele jatqanyn aitty. Ol túski úziliste úiine kirip, jumys ornyna qaita bet alǵan.
Týysynyń sózinshe, qarsy baǵyttan shyqqan kólik Romannyń avtomobiline týra kelip soǵylǵan. Jedel járdem qyzmetkerleri onyń ómirin saqtap qalýǵa áreket jasaǵanymen, alǵan jaraqattary tym aýyr bolǵan.
«Ol basynan qatty jaraqat alyp, keýdesimen rýlge soǵylǵan. Qaýipsizdik jastyǵy ashylǵanymen, ony aman alyp qala almady. Endi tórt bala jetim qaldy», – dedi Svetlana Vitenbek.
Úlken qyzy sińlilerin qamqorlyǵyna almaq
Otbasynyń 22 jastaǵy úlken qyzy Zlata úsh sińlisin óz qamqorlyǵyna alý úshin qujat jinaýdy bastaǵan.
Týystarynyń aitýynsha, toǵyz jastaǵy kenje qyzǵa ákesiniń qaza bolǵany áli aitylmaǵan.
Marqumnyń jaqyndary apatqa sebepker boldy degen júrgizýshiniń mas kúide bolǵanyn málimdedi. Olar istiń ádil tergelip, kináli adam zańǵa sáikes jaýapqa tartylǵanyn qalaidy.
Al saraptama Roman Bondardyń ishimdik ishpegenin kórsetken.
Lada júrgizýshisi qamaýǵa alyndy
Batys Qazaqstan oblystyq Politsiia departamenti jol apatyna qatysty sotqa deiingi tergeý bastalǵanyn habarlady.
Lada Granta júrgizýshisi ustalyp, ýaqytsha ustaý izoliatoryna qamalǵan.
Qazirgi ýaqytta oqiǵanyń barlyq mán-jaiyn anyqtaý úshin tergeý júrgizilip, sot-meditsinalyq saraptamalar taǵaiyndalǵan. Olardyń qorytyndysy boiynsha túpkilikti protsessýaldyq sheshim qabyldanady.
Roman Bondar 30 shildede jerlendi.
