ورال ماڭىندا بولعان اۋىر جول اپاتىنان تٶرت بالاسىن جالعىز ٶزٸ تەربيەلەپ وتىرعان 47 جاستاعى رومان بوندار قازا تاپتى. ونىڭ جۇبايى بىلتىر قايتىس بولعان, دەپ حابارلايدى "موي گورود".
قايعىلى جاعداي 27 شٸلدەدە دەركٶل كەنتٸ ماڭىنداعى اينالما جولدا بولعان. اپاتقا ٷش كٶلٸك قاتىسقان.
پوليتسييانىڭ الدىن الا مەلٸمەتٸنشە, Lada Granta جٷرگٸزۋشٸسٸ جول ەرەجەسٸن بۇزىپ, قارسى قوزعالىس جولاعىنا شىققان. سالدارىنان ول Volkswagen Golf كٶلٸگٸمەن بەتپە-بەت سوقتىعىسقان. كەيٸن سول باعىتتا كەلە جاتقان Mercedes-Benz Sprinter شاعىن اۆتوبۋسى Volkswagen كٶلٸگٸنٸڭ ارتقى بٶلٸگٸنە سوعىلعان.
Volkswagen جٷرگٸزۋشٸسٸ رومان بوندار العان اۋىر جاراقاتتارىنان وقيعا ورنىندا كٶز جۇمدى.
تٶرت بالا اتا-اناسىز قالدى
مارقۇم جۇبايى قايتىس بولعاننان كەيٸن تٶرت قىزىن جالعىز تەربيەلەپ كەلگەن. ونىڭ ەيەلٸ ولگا بىلتىر قاراشادا تاماق ٸشٸپ وتىرعاندا تۇنشىعىپ, قايتىس بولعان.
بالالاردىڭ كەنجەسٸ توعىز جاستا. جاقىندارىنىڭ ايتۋىنشا, رومان وتباسىن اسىراۋ ٷشٸن بٸرنەشە جەردە جۇمىس ٸستەگەن.
وتباسىنىڭ تۋىسى سۆەتلانا ۆيتەنبەك اپات بولعان كٷنٸ روماننىڭ دەركٶلدەن قالاعا قاراي كەلە جاتقانىن ايتتى. ول تٷسكٸ ٷزٸلٸستە ٷيٸنە كٸرٸپ, جۇمىس ورنىنا قايتا بەت العان.
تۋىسىنىڭ سٶزٸنشە, قارسى باعىتتان شىققان كٶلٸك روماننىڭ اۆتوموبيلٸنە تۋرا كەلٸپ سوعىلعان. جەدەل جەردەم قىزمەتكەرلەرٸ ونىڭ ٶمٸرٸن ساقتاپ قالۋعا ەرەكەت جاساعانىمەن, العان جاراقاتتارى تىم اۋىر بولعان.
«ول باسىنان قاتتى جاراقات الىپ, كەۋدەسٸمەن رۋلگە سوعىلعان. قاۋٸپسٸزدٸك جاستىعى اشىلعانىمەن, ونى امان الىپ قالا المادى. ەندٸ تٶرت بالا جەتٸم قالدى», – دەدٸ سۆەتلانا ۆيتەنبەك.
ٷلكەن قىزى سٸڭلٸلەرٸن قامقورلىعىنا الماق
وتباسىنىڭ 22 جاستاعى ٷلكەن قىزى زلاتا ٷش سٸڭلٸسٸن ٶز قامقورلىعىنا الۋ ٷشٸن قۇجات جيناۋدى باستاعان.
تۋىستارىنىڭ ايتۋىنشا, توعىز جاستاعى كەنجە قىزعا ەكەسٸنٸڭ قازا بولعانى ەلٸ ايتىلماعان.
مارقۇمنىڭ جاقىندارى اپاتقا سەبەپكەر بولدى دەگەن جٷرگٸزۋشٸنٸڭ ماس كٷيدە بولعانىن مەلٸمدەدٸ. ولار ٸستٸڭ ەدٸل تەرگەلٸپ, كٸنەلٸ ادام زاڭعا سەيكەس جاۋاپقا تارتىلعانىن قالايدى.
ال ساراپتاما رومان بونداردىڭ ٸشٸمدٸك ٸشپەگەنٸن كٶرسەتكەن.
Lada جٷرگٸزۋشٸسٸ قاماۋعا الىندى
باتىس قازاقستان وبلىستىق پوليتسييا دەپارتامەنتٸ جول اپاتىنا قاتىستى سوتقا دەيٸنگٸ تەرگەۋ باستالعانىن حابارلادى.
Lada Granta جٷرگٸزۋشٸسٸ ۇستالىپ, ۋاقىتشا ۇستاۋ يزولياتورىنا قامالعان.
قازٸرگٸ ۋاقىتتا وقيعانىڭ بارلىق مەن-جايىن انىقتاۋ ٷشٸن تەرگەۋ جٷرگٸزٸلٸپ, سوت-مەديتسينالىق ساراپتامالار تاعايىندالعان. ولاردىڭ قورىتىندىسى بويىنشا تٷپكٸلٸكتٸ پروتسەسسۋالدىق شەشٸم قابىلدانادى.
رومان بوندار 30 شٸلدەدە جەرلەندٸ.
