Oraldaǵy dúken sórelerinen qarapaiym as tuzyn tabý qiyndap ketti, dep habarlaidy Dalanews.kz agenttigi “Moi gorod” telegram arnasyna silteme jasap.
“Oraldaǵy dúkenderde, iri sýpermarketter men bazarlarda keiingi kúnderi qarapaiym as tuzyn tabý múmkin bolmai qaldy. Áleýmettik jelilerde turǵyndar birneshe saýda núktesin aralasa da, tuz joq ekenin jazyp jatyr”, – delingen habarlamada.
Jergilikti jurtshylyq jaǵdaiǵa alańdap otyr.
“Úidiń mańyndaǵy úsh dúkendi araladym, esh jerde tuz joq. Satýshylardyń aitýynsha, sońǵy eki kúnde tuz taýsylyp qalǵan. 2020 jyl qaita kelgendei kúidemin”, – deidi qala turǵyny Ainur.
Osyǵan uqsas jaǵdaidy Rýslan esimdi turǵyn da baiandady.
“Arnaiy tuz alý úshin “Dina” sýpermarketine bardym, biraq sóre bos. Keiin ortalyq bazarǵa bardym, onda da joq. “Peshehodqa” soqtym, taǵy tappadym. Etti nemen tuzdaimyz? Jańa ǵana soǵym ákelgen edim”, – deidi ol.
BAQ málimetinshe, tuz iri sýpermarketterde ǵana emes, shaǵyn dúkenderde de taýsylǵan. Bazardaǵy satýshylar da tuzdyń nege joǵalǵanyn túsindire almai otyr.
“Keibir saýdagerler qaljyńdap, oraldyqtar jappai soǵym daiyndap, qyryqqabat tuzdap jatyr deidi. Al jetkizýshilerdiń aitýynsha, Batys Qazaqstan oblysyna tuz jetkizý bir ai buryn toqtaǵan. Negizgi sebep – Qazaqstan temir jolyndaǵy vagon tapshylyǵy. Qazan aiynyń sońynda kúshine engen jańa tasymal erejeleri tek otandyq temirjol vagondaryn qoldanýdy mindetteidi. Sonyń kesirinen Reseidiń arzan ári tez jetkiziletin “Sol-Iletskaia” tuzyn óńirge jetkizý múmkin bolmai jatyr. Al otandyq óndirýshiler óńirdiń suranysyn tolyq qamti almaidy”, – delingen aqparatta.
Sonymen birge turǵyndar jaǵdaidyń jaqyn kúnderi qalypqa kelip, tuz qalypty baǵamen qaita sórelerge shyǵaryna úmitti.
