Oral qalasynda «Aq bidai» VIII oblystyq aýyl sporty oiyndarynyń saltanatty ashylýy ótti. Jarysqa Batys Qazaqstan oblysynyń barlyq aýdandarynan kelgen sportshylar qatysýda,- dep habarlaidy Dalanews.kz
Atalǵan sharanyń maqsaty – aýyldyq jerlerde buqaralyq sportty damytý, turǵyndar arasynda salaýatty ómir saltyn qalyptastyrý jáne ulttyq sport túrlerin keńinen nasihattaý.
Saltanatty ashylý rásimine oblys ákimi Nariman Tóreǵaliev qatysyp, qatysýshylarǵa sáttilik tilep, aýyl sportynyń damýyna memleket tarapynan turaqty qoldaý kórsetilip otyrǵanyn atap ótti.
«Býrabaida ótken Ulttyq quryltaidyń 4-shi otyrysynda Prezidentimiz Qasym-Jomart Kemeluly Toqaev: «Sportty nasihattaý, ony ásirese balalar men jasóspirimder arasynda dáripteý – ult saýlyǵynyń kepili. Sońǵy jyldary memleket qoldaýynyń nátijesinde balalar sporty qarqyndy dami bastady» dep sporttyń damýyna basa nazar aýdarǵan bolatyn. Osy oraida óńirimizde sporttyń damýyna jan-jaqty jaǵdai jasalyp keledi. 2024 jylǵa deiin oblysymyzdyń barlyq aýdan ortalyqtary zamanaýi dene shynyqtyrý-saýyqtyrý keshenderimen qamtamasyz etildi. Sonymen qatar, Memleket basshysynyń óńirge jumys sapary barysynda bergen tapsyrmasyna sáikes ótken jyly Oral qalasynda - «Jaiyq Arena» kóp fýnktsionaldy sport kesheni el igiligine berildi. Endigi kezekte oblystyń iri aýyldary 14 sport nysandarymen qamtylatyn bolady», – dedi aimaq basshysy.
Spartakiada baǵdarlamasyna qazaq kúresi, voleibol, kókpar, asyq atý, sadaq atý, toǵyzqumalaq jáne ózge de sport túrleri engizilgen. Jalpy sany 1000-nan astam sportshy qatyspaq.
«Aq bidai» aýyl sporty oiyndary 9 tamyzǵa deiin jalǵasady. Jeńimpazdar komandalyq jáne jekelei esepte anyqtalatyn bolady. Sharany uiymdastyrýshylar – oblystyq dene shynyqtyrý jáne sport basqarmasy men aýdan ákimdikteri.
«Aq bidai» aýyl sporty oiyndary Batys Qazaqstan oblysynda 2010 jyldan beri ótkizilip keledi. Jarys buqaralyq jáne ulttyq sport túrlerin damytýǵa, sondai-aq óńirishilik yntymaqtastyqty nyǵaitýǵa baǵyttalǵan.
Jalpy búginde oblysta dene shynyqtyrý jáne sportpen turaqty shuǵyldanýshylardyń jalpy sany 286 myń adamdy, ol oblys halqynyń 41,2 % quraidy. 2029 jyly deiin bul kórsetkishti 50%-ǵa jetkizý josparlanyp otyr. Bul maqsatta oblys kóleminde 1563 sporttyq qurylym jumys isteidi.
