Balanyń psihologiialyq jaǵdaiy tek otbasyǵa emes, mekteptegi ortaǵa da tikelei bailanysty. Mamandardyń aitýynsha, bilim ordasynda bala ózin qaýipsiz ári qoldaý baryn sezinýi kerek. Osy tusta psiholog mektepte balamen jumys isteýdiń negizgi qaǵidalaryn atap ótti, dep habarlaidy Dalanews.kz.
Mamannyń sózinshe, balanyń jaǵdaiyn tolyq túsiný úshin mektep pen ata-ana arasynda ashyq bailanys bolýy qajet. Qiyndyqtar baiqalsa, ony birge talqylap, sheshim izdeý mańyzdy.
“Mektep - balanyń ekinshi úii. Sondyqtan onyń psihologiialyq qaýipsizdigin qamtamasyz etý - tek bir mamannyń emes, búkil mektep ujymynyń ortaq jaýapkershiligi”, - deidi psiholog Limana Quttybekqyzy.
Onyń sózinshe, sýitsidtik minez-qulyqtyń aldyn alý der kezinde qoldaý kórsetýden jáne durys qarym-qatynastan bastalady. Sondyqtan ol balalardyń ishki kúiine qurmetpen qaraýǵa shaqyrdy.
“Ár oqýshy - jeke tulǵa. Onyń pikirin tyńdap, emotsiiasyn joqqa shyǵarmai tyńdai bilý mańyzdy. Senim bar jerde ǵana bala ashylady. Al bala oiyn erkin aita alsa, qiyndyqtaryn jasyryp qalmaidy”, - dep qosty psiholog.
Maman minez-qulyqtaǵy ózgeristerge beijai qaramaýǵa úndedi.
“Tuiyqtalý, kóńil kúidiń jii ózgerýi, qyzyǵýshylyqtyń tómendeýi - kómek qajet ekenin bildiredi. Mektep psihologtary tek másele týyndaǵanda emes, aldyn alý baǵytynda turaqty jumys isteýi kerek”, - dep tolyqtyrdy ol.
Aitýynsha, býlling balalardyń psihologiialyq jaǵdaiyna áser etetin negizgi faktorlardyń biri.
“Mektep ujymy mundai jaǵdailardy erte anyqtap, oqýshylarmen jii saýal júrgizip otyrýy kerek”, - deidi ol.
Maman qazirgi tańda mektep psihologtarynyń róli artyp kele jatqanyn alǵa tartty.
“Biraq kóp mektepte bir psihologqa júzdegen oqýshydan keledi. Bul ár balaǵa kóńil bólýge múmkindik bermeidi”, - dep qosty ol.
Osyǵan bailanysty sarapshy júieli ózgerister qajet ekenin atap ótti.
“Psihologiialyq qyzmetti kúsheitý úshin mamandardyń júktemesin azaityp, aldyn alý baǵdarlamalaryn kóbeitý kerek”, - deidi Quttybekqyzy.
