Alqaly basqosýda birinshi bolyp sóz alǵan Ǵani Bektaiuly bul joba bilim salasyn damytýdyń Jol kartasy aiasynda qolǵa alynyp otyrǵan mańyzdy baǵyttardyń biri ekenin alǵa tartty.
– «Oqýǵa qushtar mektep» jobasyn elimizdegi mektep qasyndaǵy kitaphanalardyń jumysyn damytý arqyly júzege asyrýdy josparlap otyrmyz. Búginde respýblika boiynsha mektep janyndaǵy kitaphanalarda 200 mln danadan astam kitap qory saqtaýly. Olardyń 38 mln kórkem ádebietter quraidy. Osy kórkem ádebietterdiń 20-30 paiyzyn 80-90 jyldary shyqqan, eski kórkem ádebietter men merzimdi basylymdar quraidy.
Olar oqýshylardyń qyzyǵýshylyǵyn oiatpaityny anyq. Sondyqtan Memleket basshysy Qasym-Jomart Toqaev bilim salasyn Jol kartasyn damytý baǵdarlamasynda mektep kitaphanalaryn qajetti kórkem ádebiettermen qamtamasyz etý máselesin tapsyrǵan bolatyn. Osy rette bizder Prezident tapsyrmasyn zerdelei kele, kitaphana qoryn qyzyqty kitaptarmen baiytý isin aldaǵy bes jyldy tolyqtai qamtamasyz etýdi kózdep otyrmyz, – dep «Oqýlyq» ǵylymi-praktikalyq ortalyǵynyń direktory Ǵani Beisembaev jaǵdaidy qysqasha baiandap berdi.
Mine, másele qaida jatyr. Ádette aqyn-jazýshylar biriniń aýzyna biri túkirip qoiǵandai, jastar kitap oqymaidy dep jastardy bosqa kinálaý ádetke ainalǵany jasyryn emes. Óz kezeginde Memleket basshysy Qasym-Jomart Toqaev qoǵamdaǵy máseleni dál baiqap, bul máseleni sheshýdiń ońtaily jolyn usynbaǵanda ne ister edik?
«Oqýlyq» ortalyǵynyń jetekshisi mektep kitaphanalaryndaǵy Keńes zamanynda basylyp shyqqan kórkem ádebiettiń ábden eskirgenin ózi de moiyndady. Keńestik ideologiia turǵysynan jazylǵan mundai kitaptardy óskeleń urpaqqa usynýdyń ózi ábes qylyq ekeni anyq. Aldaǵy ýaqytta bul máseleni jedel túrde sheship, mektep oqýshylaryna qyzyqty kórkem ádebietterdi usynýdyń mańyzy zor.
«Oqýlyq» ortalyǵynyń jetekshisi Ǵani Beketaiuly aldaǵy bes jylǵa josparlanǵan jobada jastardy qyzyqtyratyn tórt baǵyt belgilenip, sol taqyryptar aiasynda kórkem ádebietterdi shyǵaryp, ony elimizdegi mektep kitaphanalaryna taratýdy kózdep otyrǵanyn alǵa tartty. Osy rette belgilengen tórt taqyryp jaiynda aita ketsek. Birinshi baǵytta moiyndalǵan qazaq ádebietiniń klassik aqyn-jazýshylarynyń kitaptaryn qaita basý kózdelse, ekinshi baǵytta álem ádebieti klassikteriniń kitaptaryn qazaq tilinde sóiletip, mektep jasyndaǵy balalarǵa qyzyqty shyǵarmalardy usyný qarastyrylypty. Úshinshi baǵytta qazirgi zamanǵy talantty jazýshylardyń shyǵarmalaryn kitap qylyp shyǵarý qarastyrylǵan. Al tórtinshi baǵytty ǵylymi-tanymdyq jáne oqý-ádistemelik ádebietterdi shyǵarý josparlanypty. Osy baǵdarlama iske asqan jaǵdaida elimizdegi mektep kitaphanalarynyń qory jyl saiyn 20 paiyzǵa jańaryp otyrady eken. Taǵy da aita ketetin jait, joǵaryda atap ótken baǵyttar boiynsha tańdalynyp alǵan týyndylardy bilikti mamandardan quralǵan arnaiy komissiia suryptap, taldaǵannan keiin kitap bolyp basylyp shyǵatynyn aita ketýimiz kerek.
Ortalyq kommýnikatsiia qyzmetinde ótken basqosýda «Oqýlyq» ǵylymi-praktikalyq ortalyǵynyń direktory Ǵani Beisembaev bul joba aiasynda mektep kitaphanalarynyń qoryn tolyqtyrýdan bólek, kitaphanalardyń materialdyq-tehnikalyq jaǵdaiyn jaqsartý isine de airyqsha kóńil bólinip otyrǵanyn tilge tiek etti.
– Qazirgi tańda mektep kitaphanalarynda oqýshylardyń kitap oqýyna qolaily oqý zaldary joq. Aldaǵy ýaqytta osy olqylyqtyń ornyn toltyratyn bolamyz. Búginde jańadan salynǵan mektepterdiń ózinde oqý orny qarastyrylmaǵan. Bul kemshilikti tez arada joiatyn bolamyz. Oqý zaldary bezendirilip, qajetti kompiýterlik jabdyqtarmen jabdyqtalatyn bolady. Budan basqa mektep kitaphanalarynda jumys isteitin kitaphanashylardyń kásibi biliktiligin arttyrýdy da kózdep otyrmyz. Birinshi kezekte olardy attestatsiiadan ótkizip, ailyq jalaqysyn kóterý qarastyrylýda. Budan keiin elimizdegi joǵary oqý oryndary daiyndaityn kitaphanashy mamandyǵynyń statýsyn kóterip, «pedagog – kitaphanashy» degen mártebe beriletin bolady, – dedi Ǵani Beisembaev.
Osylaisha, QR Bilim jáne ǵylym ministrligi kópten beri qoǵam nazarynan tys qalǵan mekteptegi kitaphanalardyń jaǵdaiyn jaqsartýdy alǵash ret qolǵa alyp otyr. Bul óz kezeginde elimizde ultjandy, patriot jastardyń sanyn arttyra túsetin mańyzdy shara dep esepteimiz.
Nurlan Jumaqanov
