Úkimet otyrysynda Oqý-aǵartý ministri litsenziiadan keiingi baqylaý júiesi engiziletinin málimdedi, dep habarlaidy Dalanews.kz.
"El boiynsha 880-nen astam jekemenshik mektep bar. Onyń ishinde 785-ten astamy tsifrlandyrylǵan jáne qazirgi tańda memlekettik tapsyrys ala bastady. Jalpy litsenziia máselesine kelsek, biz kadrlyq qamtamasyz etýge erekshe kóńil bólemiz. Sebebi kóptegen mektepte maman tapshylyǵy baiqaldy", - dedi Juldyz Súleimenova.
Litsenziiadan keiingi baqylaýdy júzege asyrý Bas prokýratýra men óńirlerdegi ýákiletti organdarǵa júkteldi.
Tekserý kezinde negizgi ólshemder retinde oqý protsesiniń sapasy, pedagogterdiń biliktiligi jáne oqýshylardyń qaýipsizdigin qamtamasyz etý máseleleri qaralatyn bolady.
"Ǵimarattarǵa qatysty da másele bar. Ózderińiz bilesizder, keibireýler mektepterdi monshada nemese qoimada ashyp, on jyldan astam ýaqyt jumys istegen. Sońǵy bes jylda tipti memlekettik tapsyrys alǵandary da bar. Biz mundai zańbuzýshylyqtardy joiatyn bolamyz", - dedi ministr.
