Elimizdiń bas ustazy, Oqý-aǵartý ministri Ǵani Beisembaev barsha pedagog qaýymyn kásibi merekesimen quttyqtady, dep habarlaidy Dalanews.kz.
Bul týraly ministr jeli paraqshasynda jazdy.
"Sizderdi kásibi merekemiz — Ustazdar kúnimen shyn júrekten quttyqtaimyn! Ustaz — mamandyq iesi ǵana emes, ol óskeleń urpaqtyń rýhani baǵbany, bolashaqtyń negizin qalaýshy ult kelbeti. Qazaq halqy qai ýaqytta bolmasyn, ustazdy qurmetpen tórge shyǵarǵan.
«Ustaz — ulyq emes, uly qyzmet» dep batyr Baýyrjan Momyshuly baǵalaǵandai, memlekettiń erteńgi taǵdyryna jaýapty urpaqty tárbieleýde ustazdarǵa artylǵan amanattyń júgi salmaqty. Sebebi, árbir shákirttiń júregine bilimniń shamshyraǵyn jaǵatyn — Ustaz", — delingen jazbada.
Búginde elimizde bilim salasy boiynsha 600 myńǵa jýyq pedagog eńbek etedi. Memleket basshysynyń qoldaýynyń arqasynda pedagog mamandyǵynyń bedelin arttyrý boiynsha orasan zor sharalar júzege asyrylyp keledi. Onyń alǵashqysy da, mańyzdysy — muǵalim qaýymy kópten kútken "Pedagog mártebesi" týraly zańnyń qabyldanǵanyna da biyl 5 jyl.
Ǵani Beisembaevtyń málimetinshe, osy ýaqyt aralyǵynda muǵalimderdiń ailyǵy eki esege kóterildi. Olar qaǵazbastylyqtan, artyq júktemeden, óz mindetine jatpaityn jumystan bosatyldy, jańa yntalandyrýlar belgilenip, múmkindikterge jol ashyldy. Balabaqsha tárbieshileri men kolledjderge óndiristen tartylǵan oqytýshylardyń jalaqysy artýda. Bilim berý uiymdarynyń infraqurylymynyń, materialdyq-tehnikalyq bazasynyń joǵarǵy talaptarǵa sáikes jaqsarýy men jabdyqtalýyna baǵyttalǵan «Jaily mektep» ulttyq jobasy memleket tarapynan bilim salasyna sońǵy jyldarda kórsetilgen qamqorlyqtyń aiqyn mysaly bola alady. Bul baǵyttaǵy jumys áli de kúsheitilip, jalǵasýda.
"Uly aǵartýshy Ybyrai Altynsarin "Muǵalim — mekteptiń júregi" dep beker aitpaǵan. Mekteptiń, balanyń bolashaǵy sizderdiń qoldaryńyzda, qurmetti Ustazdar! Sizderdiń eńbekterińiz — elimizdiń jarqyn ári baqytty bolashaǵynyń negizi. Biz halqymyzdyń dástúrleri men qundylyqtaryna qurmetpen qarap, qadirleitin sanaly urpaq qalyptastyrýǵa bar jan-tánimizdi salamyz. Sebebi, biz árisi — Ál-Farabi, Abai, Y.Altynsarin, A.Baitursynuly sekildi kórnekti oishyldardyń, berisi — K.Nurǵaliev, K.Aitqaliev, K.Bitibaeva, R.Nurtazina, M.Tasova sekildi eldiń qurmetine bólengen qairatkerlerdiń, Aiagúl Mirazova, Alina Soloveva, Alma Shúkijanova ispetti Eńbek erleriniń jolyn laiyqty jalǵastyrýymyz kerek.
Qurmetti ustazdar! Qurmetti áriptester! Sizderdiń qajyrly eńbekterińiz ben óz isterińizge degen adaldyqtaryńyz úshin shynaiy alǵysymdy bildiremin.
Sizderdiń arqalaryńyzda oqýshylarymyz túrli halyqaralyq bilim dodalarynda kók bairaǵymyzdy jeńis tuǵyrynan jelbiretip keledi. Elimizdiń óskeleń urpaǵynyń ziiatkerlik áleýetine kúlli álem joǵary baǵa berdi. Tek osy jyldyń ózinde bizdiń oqýshylarymyz 58 altyn medal jeńip alyp, robototehnikadan álemniń úsh dúrkin, himiiadan eki dúrkin chempiony atandy. Sizderdiń denderińizge saýlyq, sarqylmas qýat, qyzmette tabysty bolyp, abyroi biiginen kórinýlerińizdi tileimin!", — dep jazdy ministr.
