OQO-da Qazaqstan halqynyń birligi kúni atalyp ótildi
Shymkent qalasynda 1 mamyr – Qazaqstan halqynyń birligi kúni atalyp ótildi. Merekelik sharanyń shymyldyǵy «Ashyq El» atty teatrlandyrylǵan mýzykalyq qoiylymymen túrildi. Yntymaq pen berekeni ulyqtaityn meiramǵa arnalǵan keshte alǵashqy bolyp sóz alǵan oblys basshysy Janseiit Túimebaev Ońtústik jurtyn aitýly merekemen quttyqtady.
– Qazaqstan halqynyń birligi kúni merekesi – búgingi tańda beibit ómir men yntymaqta turmys keship otyrǵan el turǵyndary úshin ystyq yqylas pen dostyq niettiń dástúri, asyǵa kúter meiramy. Elbasymyz N.Á.Nazarbaevtyń saliqaly saiasatynyń arqasynda el aýmaǵynda júzden astam etnos ókilderi tatý-tátti ómir súrýde. Osynyń nátijesinde Qazaqstan yntymaǵy jarasqan, yrysy artqan elge ainaldy. Memleketimizdiń basty bailyǵy – qoǵamdaǵy kelisim men tatýlyqty saqtaý isine árbirimiz jaýaptymyz. Qazaqstan halqynyń birligi merekesi qutty bolyp, barshańyzdyń shańyraqtaryńyzdan shattyq ketpesin, – dedi Janseiit Qanseiituly.
Keiin oblys basshysy óńirdegi etno-mádeni ortalyq ókilderine «Baýyrmal» syilyǵyn tapsyrdy. Olardyń qatarynda oblystyq «Yntymaq» ultaralyq mádeniet ortalyǵy» qoǵamdyq birlestiginiń tóraiymy G.Tólepova, oblystyq «Tatar-bashqurt mádeni ortalyǵy» birlestiginiń tóraiymy A.Mýhamedova, «Qazaqstan káristeri assotsiatsiiasy» Respýblikalyq qoǵamdyq birlestiginiń Ońtústik Qazaqstan oblystyq filialynyń tóraiymy R.Pak syndy etno-mádeni ortalyq basshylary bar.
Merekelik shara «Kóńildi dastarhan» – vokaldy horeografiialyq kompozitsiiamen jáne «Álem yrǵaǵy» atty túrli ult aspaptardyń oryndaýynda mýzykalyq qoiylymmen jalǵasty.
Keiin oblys basshysy J. Túimebaev túrli mádeniet ortalyqtary daiyndaǵan kórmeni tamashalady. Sharaǵa etnos ókilderi salt-dástúrleri men ádep-ǵuryptaryn tanytatyn turmystyq zattaryn qoiǵan.
Sondai-aq, mereke kúni qazaq estrada juldyzdarynyń kontserti ótip, otshashýǵa ulasatyn bolady.
OQO ákiminiń baspasóz qyzmeti
