Elbasy N.Nazarbaev «Qazaqstan - 2050» Strategıasy Joldaýynda: «Búkil álemdegi sıaqty, Qazaqstan mektepke deıingi bilim berýdiń jańa ádisterine kóshý kerek. Sizder bilesizder, men basty mindeti balalarymyzdyń bastapqy múmkindikterin teńestirý bolǵan «Balapan» baǵdarlamasy bastamasyn kóterdim. Ol júzege asyryla bastaǵan sátten beri 3 956 jańa balabaqsha men shaǵyn ortalyq iske qosyldy. Týý kórsetkishiniń joǵarylyǵyn, jalǵasyp jatqan demografıalyq ósimdi eskere kele, men «Balapan» baǵdarlamasyn 2020 jylǵa deıin uzartýǵa sheshim qabyldadym. Úkimet pen ákimderdiń aldyna balalardy mektepke deıingi bilim berý jáne tárbıemen 100% qamtýǵa qol jetkizý mindetin qoıamyn»,- dep óńirde balabaqsha sanyn arttyrýdy tapsyrǵan bolatyn. Prezıdent Joldaýynda júktelgen tapsyrma Ońtústikte tıisti deńgeıde atqarylyp jatyr.

Naqtyraq aıtsaq, oblystyq bilim berý júıesinde memlekettik-jekemenshik áriptestikti odan ári damytý maqsatynda 38 bilim nysandarynyń qurylysyn áriptestik esebinen 2017-2021 jyldar aralyǵynda iske asyrý josparlanyp otyr. Búginge deıin 4 joba boıynsha áleýetti jekeshe áriptestikti aıqyndaý úshin konkýrs ótkizildi. Konkýrsqa 5 jeke ınvestor qatysty. Onyń 4-i eń úzdik konkýrstyq ótinim berýshi retinde tirkeldi.

Atap aıtsaq, Báıdibek aýdany Bógen aýyldyq okrýgi Shaldar aýylyndaǵy 140 oryndyq balabaqsha qurylysyna «Qarakól LTD» jaýapkershiligi shekteýli seriktestigi úzdik konkýrstyq ótinim berýshi retinde tanyldy. Bul balabaqshanyń smetalyq quny 422,860 mln. teńge boldy.

Otyrar aýdany, Kóksaraı aýyl okrýgindegi turǵyndar sany kóp Kóksaraı eldi mekenindegi 240 oryndyq balabaqsha qurylysyna «TOLAGAI-2050» JSHS-i úzdik konkýrstyq ótinim berýshi retinde tanyldy. Smetalyq quny 508,746 mln. teńgeni qurady.

Al, bala týý kórsetkishi joǵary Túlkibas aýdanyndaǵy Aqbıik aýylynda 100 oryndyq balabaqshanyń qurylysyna «Roproekt» JSHS-i úzdik konkýrstyq ótinim berýshi retinde tanyldy. Onyń smetalyq quny 234,350 mln. teńgeden asty.