Onyń aıtýynsha, óńirde sonymen qatar 803 áleýmettik, 723 mádenıet mekemesi, 61 sport nysany men jumyspen qamtý salasyndaǵy 19 mekeme qys merzimine tolyq ázirlikten ótken. Al oblystaǵy 3209 búdjettik mekeme 176,9 myń tonna qatty jáne 5,8 mln lıtr suıyq otynmen qamtamasyz etilgen.
«Búgingi tańda oblysymyzdaǵy ortalyqtandyrylǵan jylýmen qamtamasyz etiletin 2327 kópqabatty turǵyn úıdiń 2094-i qysqa maýsymǵa daıyndyqtan ótken. Qalǵan 233 úıdi 1 qarashaǵa tolyq daıyndaý josparlanyp otyr. Sondaı-aq, jylý energıasyn óndirýshi kásiporyndarǵa qatty otyn qory kestege sáıkes tasymaldanýda», - dedi M.Maraıym.
Sondaı-aq baspasóz konferensıasynda Shymkent qalasynyń jylý berý maýsymyna daıyndyq barysyn baıandaǵan qala ákiminiń orynbasary Beısenbek Janbosynov ortalyqtandyrylǵan jylý júıesine qalanyń 1811 kópqabatty úıleri qosylǵanyn atap ótti. Spıkerdiń málimdeýinshe, atalǵan kópqabatty turǵyn úılerdiń búgingi tańda 1610-ny jylý maýsymyna daıyn. Al, qalǵan tutynýshylar jylý maýsymyna deıin daıyndyq jumystaryn aıaqtaıdy.
Búgingi tańda qalanyń ońtústik bóligindegi dıametri 1000 mm jylý júıesi tolyǵymen sýǵa toltyrylsa, erteńnen bastap qalanyń ońtústik bóligindegi magıstraldyq jáne ishki oramdyq jylý júıelerin sýmen toltyrý jumystary bastalady eken. Al qalanyń soltústik bóligindegi jylý júıelerine qazan aıynyń 1-nen bastalady.
Oblystaǵy búdjettik mekemeler men kópqabatty turǵyn úılerge jylý berý arnaıy bekitilgen erejege sáıkes júrgiziletin bolady. Iaǵnı, syrtqy aýa temperatýrasynyń ortasha kórsetkishi 5 táýlik boıy +5°S jáne odan tómen bolsa, jylytý maýsymyn bastaý týraly sheshim qabyldanady.
Aıta keteıik, búgin Ońtústik Qazaqstan oblysynyń ákimi J.Túımebaevtyń tóraǵalyǵymen ótken selektorlyq jıynda oblystyń 2017-2018 jyldardaǵy jylý berý maýsymyna daıyndyq barysy qaralǵan bolatyn.
Onda ákim qys merzimine daıyndyq jumystary boıynsha apta saıyn turaqty túrde monıtorıń júrgizip, baqylaýǵa alý qajettigin aıtyp, tıisti sala basshylaryna naqty mindettemeler júktedi.
OQO ákiminiń baspasóz qyzmeti
