Ońtústikte qýatty biogaz qondyrǵysy iske qosyldy
Aita ketsek, bul EKSPO-2017 halyqaralyq mamandandyrylǵan kórmesinde óńirdiń basty jobasy retinde tanystyrylǵan edi. Joba Memleket basshysynyń jańa energetikany damytý tapsyrmasyna sáikes júzege asyp otyr.
Sarapshy mamandar biogazdy jaǵý arqyly odan saǵatyna 500 kilovatt elektr qýatyn óndirip jatyr. Mundaǵy biogaz qalanyń shaiyndy sýynyń súzilgen shógindisinen alynady. Keshendegi qondyrǵylar Chehiianyń jańa tehnologiiasy negizinde jasalǵan. Ol qaldyqtardy óńdeý arqyly táýligine 300 tekshe metr metan gazyn óndiredi.
Joba jetekshisi Anarbek Ormanovty aitýynsha, atqarylatyn jumys aýyry áli alda. Sebebi, jobanyń ekinshi kezeńi bar.
«Saǵatyna 200-300 kilovatt qosymsha elektr energiiasyn alamyz degen jospar bar. Bul jobanyń tiimdiligi orasan. Eń áýeli qorshaǵan ortany lastamaidy», – deidi ol.
Búgingi tańda óndiris ornynda 20-ǵa jýyq adam turaqty jumys ornymen qamtylǵan.
Osyndaǵy shógindilerdi óńdeý tsehynyń basshysy Igor Gasanovtyń pikirinshe, osy jobanyń aiasynda qorshaǵan ortaǵa keltirer aýyrtpalyqty azaitýǵa bolady.
«Buryndary shógindi óńdeýde ekologiiaǵa ziiany tietin. Endi shógindilerdi jylý men elektr energiiasyn óndirý úshin paidalanamyz», – deidi ol.
