Saıdyń tasyndaı iriktelip, 5 komandaǵa bólingen jastar ulttyq salt-dástúrimizdi jańǵyrtý, jastardyń boıyndaǵy shyǵarmashalyq qabiletterimen ónerge degen qushtarlyǵyn arttyrý maqsatynda ózara synǵa tústi.
Saıysta er jigitter mal soıyp, atty erttep, otyn jaryp, samaýryn qoıyp, jún qyrqsa, boıjetkender taba nan pisirý, túıe saýý, kúbi pisý, qurt jasaý, baýyrsaq pisirý sekildi syndardan ótti.
Ulttyq dástúrlerdi jas urpaqtyń boıyna sińirýde aıryqsha mańyzǵa ıe jobada bar ónerlerin ortaǵa salǵan saıyskerler bir synda jeńilis tapsa, kelesi synda ese qaıtaryp, kórermenderdiń delebesin qozdyryp, tamasha kóńil kúı syılady.
Ásirese, jastardyń atty ertteýi, mal soıý, jún qyrqý, kúbi pisý, qurt jasaý sáti tartysty ári shıelenisti ótip, qazylar alqasynyń baǵa berýine de qıyndyqtaryn týdyrdy.
Saıysqa qatysýshylarǵa ádil baǵalaryn bergen qazylar alqasynyń sheshimimen jobaǵa qatysýda aıryqsha belsendiligi úshin «Alash» toby yntalandyrý syılyǵyna ıe bolsa, úshinshi oryn «Qazaq jastary» komandasyna buıyrdy. «Aı medet» toby ekinshi orynalsa, «Samuryq» toby júldeli birinshi oryndy aldy.
Jobanyń bas báıgesin - «Saryjaılaý» toby qanjyǵasyna baılady. Jeńimpazdar men júldegerlerdi arnaıy syılyqtarmen marapattaǵan aýdan ákiminiń orynbasary Ryskeldi Álish pen oblystyq jastar resýrstyq ortalyǵynyń dırektory Bereke Dúısebekovter Ult Kóshbasshysynyń syndarly saıasatyn óskeleń urpaqtyń arasynda jan-jaqty nasıhattaý, salt-dástúrimizdi jańǵyrtýda qosqan úlesteri úshin jastarǵa alǵystaryn jetkizdi.
Mundaı ıgi isterdi odan ary jalǵasyn tabatyndyǵy aıtylyp, jastardyń aldaǵy josparlaryna sáttilik tiledi.
