سايدىڭ تاسىنداي ىرىكتەلىپ، 5 كومانداعا بولىنگەن جاستار ۇلتتىق ءسالت-داستۇرىمىزدى جاڭعىرتۋ، جاستاردىڭ بويىنداعى شىعارماشالىق قابىلەتتەرىمەن ونەرگە دەگەن قۇشتارلىعىن ارتتىرۋ ماقساتىندا ءوزارا سىنعا ءتۇستى.
سايىستا ەر جىگىتتەر مال سويىپ، اتتى ەرتتەپ، وتىن جارىپ، ساماۋرىن قويىپ، ءجۇن قىرقسا، بويجەتكەندەر تابا نان ءپىسىرۋ، تۇيە ساۋۋ، كۇبى ءپىسۋ، قۇرت جاساۋ، باۋىرساق ءپىسىرۋ سەكىلدى سىنداردان ءوتتى.
ۇلتتىق داستۇرلەردى جاس ۇرپاقتىڭ بويىنا سىڭىرۋدە ايرىقشا ماڭىزعا يە جوبادا بار ونەرلەرىن ورتاعا سالعان سايىسكەرلەر ءبىر سىندا جەڭىلىس تاپسا، كەلەسى سىندا ەسە قايتارىپ، كورەرمەندەردىڭ دەلەبەسىن قوزدىرىپ، تاماشا كوڭىل كۇي سىيلادى.
اسىرەسە، جاستاردىڭ اتتى ەرتتەۋى، مال سويۋ، ءجۇن قىرقۋ، كۇبى ءپىسۋ، قۇرت جاساۋ ءساتى تارتىستى ءارى شيەلەنىستى ءوتىپ، قازىلار القاسىنىڭ باعا بەرۋىنە دە قيىندىقتارىن تۋدىردى.
سايىسقا قاتىسۋشىلارعا ءادىل باعالارىن بەرگەن قازىلار القاسىنىڭ شەشىمىمەن جوباعا قاتىسۋدا ايرىقشا بەلسەندىلىگى ءۇشىن «الاش» توبى ىنتالاندىرۋ سىيلىعىنا يە بولسا، ءۇشىنشى ورىن «قازاق جاستارى» كومانداسىنا بۇيىردى. «اي مەدەت» توبى ەكىنشى ورىنالسا، «سامۇرىق» توبى جۇلدەلى ءبىرىنشى ورىندى الدى.
جوبانىڭ باس بايگەسىن - «سارىجايلاۋ» توبى قانجىعاسىنا بايلادى. جەڭىمپازدار مەن جۇلدەگەرلەردى ارنايى سىيلىقتارمەن ماراپاتتاعان اۋدان اكىمىنىڭ ورىنباسارى رىسكەلدى ءالىش پەن وبلىستىق جاستار رەسۋرستىق ورتالىعىنىڭ ديرەكتورى بەرەكە دۇيسەبەكوۆتەر ۇلت كوشباسشىسىنىڭ سىندارلى ساياساتىن وسكەلەڭ ۇرپاقتىڭ اراسىندا جان-جاقتى ناسيحاتتاۋ، ءسالت-داستۇرىمىزدى جاڭعىرتۋدا قوسقان ۇلەستەرى ءۇشىن جاستارعا العىستارىن جەتكىزدى.
مۇنداي يگى ىستەردى ودان ارى جالعاسىن تاباتىندىعى ايتىلىپ، جاستاردىڭ الداعى جوسپارلارىنا ساتتىلىك تىلەدى.
