Elimiz boıynsha aq altynnyń 100 paıyzy Ońtústikte óndiriledi. Al, maqta daqylyn ósirýmen oblystaǵy 10 aýdannyń sharýalary aınalysyp keledi. Maqta daqyly eksporttyq mańyzǵa ıe bolǵandyqtan egis kólemi jyldan jylǵa artyp keledi. Máselen, bıyl Ońtústikte 134,6 myń ga jerge shıtti maqta egilse, bul ótken jylmen salystyrǵanda 25 myń ga artyq. Kóktemniń kesh túsýi men aýa raıynyń qolaısyzdyǵyna baılanysty bıyl maqta terý jumystary qarasha aıynyń 20-syna deıin sozyldy.
Maqtaaral aýdanyna jasaǵan bir saparynda oblys ákimi J.Túımebaev Ońtústik Qazaqstan oblysynyń brendi sanalatyn maqta daqyly básekege qabiletti bolý qajettigin aıtqan bolatyn. Sondaı-aq, ol, elimizdegi úlken tabys ákeletin júz jyldyq tarıhy bar maqta daqylynyń sapaly sorttaryn damytyp, ınovasıalyq tehnologıalardy óndiriske endirý arqyly aq altyndy óndirýdiń tıimdiligin arttyrýdy aıtqan-dy.
Maqta elimizdegi eksporttyq basymdyqqa ıe daqyldardyń qatarynda. Sondyqtan maqtanyń sapasyn joǵarlatýǵa erekshe mán berilgen. Búginde Ońtústik sharýalary jańa tehnologıalardy qoldaný men izdenistiń arqasynda maqta talshyǵynyń 10 surypyn jasap shyǵarǵan. Maqtanyń mundaı elıtaly suryptarynyń túsimdiligi 38-40 s/ga deıin jetedi. Búginde Ońtústik Qazaqstanda óndiriletin maqta talshyǵynyń joǵary suryptary Reseı, Belarýssıa, Germanıa, Latvıa, Moldova, QHR, Belgıa, Iran, Ýkraına, Italıa jáne Ońtústik Koreıa syndy 10 memleketke eksporttalýda. Jyl basynan beri atalǵan elderge 30 myń tonnaǵa jýyq maqta talshyǵy jóneltilgen.
M
aqta sharýashylyǵyn qoldaýǵa memleket tarapynan erekshe nazar aýdarylǵan. Maqta daqylyn ósirý úshin tyńaıtqyshtar men gerbıdsıtterge memleket tarapynan sýbsıdıa beriledi. Odan bólek, egilgen maqtanyń árbir gektaryna 15 myń teńgeden, al qaıta óńdeý úshin ótkizilgen aq altynnyń ár tonnasyna 6 myń teńgeden qarjylaı qoldaý kórsetiledi. Búginde maqta sharýashylyǵyn qoldaý úshin sýbsıdıalar taratylýda. Jyl basynan beri oblys boıynsha 134,6 myń gektarǵa 2 mlrdqa jýyq, qaıta óńdeý kásiporyndaryna ótkizilgen 140 myń tonna aq altynǵa 833 mln teńge sýbsıdıa tólengen.
