Joldaýǵa sáikes, aldaǵy 5 jylda agroónerkásip keshenindegi eńbek ónimdiligi jáne óńdelgen aýyl sharýashylyǵy ónimderiniń eksporty kem degende 2,5 ese artý qajet bolatyn. Osyǵan orai Ońtústik Qazaqstan oblysy ákimdiginde óńir basshysy Janseiit Túimebaevtyń tóraǵalyǵymen óńirdegi aýyl sharýashylyǵy salasynyń 2017-2021 jyldarǵa arnalǵan damý jospary jaiyndaǵy keńeitilgen seminar ótti.
Jiynda alǵashqy bolyp sóz alǵan oblys ákimi Janseiit Qanseiituly aýyl sharýashylyǵy óndirisindegi óńirdiń elimiz boiynsha alatyn úlesine toqtalyp, sala mamandaryna birqatar tapsyrmalar berdi.
– Jalpy respýblikalyq aýyl sharýashylyǵy óndirisinde oblysymyzdyń úlesi maqtadan – 100 paiyz, baqsha ónimderinen – 66 paiyz, júzimnen – 65 paiyz, maqsarydan – 40 paiyz, jemis-jidekten – 31 paiyz, kókónisten – 24 paiyz kóleminde. Bul kórsetkishti odan ary arttyrý úshin qarqyndy tehnologiialar men innovatsiialyq jetistikterdi keńinen óndiriske engizý qajet. Sondyqtan ǵalymdarmen birlese zertteý jumystaryn keńinen júrgizip, álemdik talaptarǵa sai ónim óndirýge umtylǵan jón. Aldaǵy ýaqytta sharýalar ozyq ylǵal únemdeý tehnologiialaryn paidalanyp, túsimdiligi joǵary, jańa sortty daqyldar egip, qarqyndy baý, jańǵaq, júzim men jemis-jidek alqaptaryn ulǵaitý kerek. Sondai-aq, tek shikizat kúiinde eksporttamai, ónimdi qaita óńdeý arqyly túrli ónim túrinde shyǵarǵanymyz durys, – dedi Janseiit Túimebaev.
Sonymen qatar, basqosýda óńirdegi mal sharýashylyǵy salasyn kórkeitý jaiy sóz boldy. Atap aitqanda, “Aqyldy jaiylym” alqaptaryn kóbeitý, aýyl, eldi mekenderdegi ortaq mal jaiylym qoryn tiimdi paidalaný, ósimdik qaldyqtaryn mal azyqtyqqa jaramdy etý joldaryn qarastyrý, ónimdiligi joǵary asyl tuqymdy maldardy paidalaný syndy usynystar aityldy.
