Ońtústik Koreiada qyzmetinen ýaqytsha shettetilgen prezident Iýn Sok Iol “búlik jasamaq boldy” jáne “bilikti asyra paidalandy” degen aiyptar boiynsha prokýratýraǵa tergeýge shaqyryldy, dep habarlaidy Dalanews.kz.
Yonhap agenttiginiń málimetinshe, bul – Iýn Sok Iolge joldanǵan ekinshi shaqyrtý. Alǵashqysyna ol jaýap qatpaǵan. Eger prezident 21 jeltoqsanǵa deiin tergeýge barmasa, ony qamaýǵa alýǵa qatysty order berý máselesi qarastyrylmaq.
Aqparatqa súiensek, prezidentti prokýratýradan bólek birneshe basqarma jaýap alýǵa shaqyrǵan. Olar, politsiia ókilderi, joǵary memlekettik qyzmetkerler arasyndaǵy sybailas jemqorlyqty tergeý basqarmasy jáne Ońtústik Koreianyń Qorǵanys ministrliginiń tergeý bólimi ókilderi. Osy shaqyrtý boiynsha Iýn Sok Iol 18 jeltoqsan, sársenbige deiin jaýap berýi tiis.
Sonymen qatar tergeý toby prezidenttiń telefon áńgimeleriniń jazbasyn alý úshin onyń qaýipsizdik qyzmetine tintý júrgizgen.
Aita keteiik, 3 jeltoqsanda Ońtústik Koreia prezidenti Iýn Sok El elde áskeri jaǵdai jariialady.
Bul sheshim oppozitsiialyq Demokratiialyq partiia Parlamentte qysqartylǵan biýdjet týraly zań jobasyn qoldap, memlekettik aýditor men bas prokýrorǵa impichment jariialaý týraly ótinish bergennen keiin qabyldandy. Alaida Ońtústik Koreianyń Ulttyq Assambleiasy elde áskeri jaǵdaidyń engizilýine qarsy daýys berdi.
Daýys berý kezinde Ulttyq assambleia ǵimaratynda áskeri jaǵdaidy joiýdy talap etken azamattar áskeri adamdarmen, politsiiamen qaqtyǵysyp qaldy. Seýl kóshelerinde áskeri tehnika paida boldy.
Keiin el prezidenti tótenshe áskeri jaǵdaidy alyp tastaitynyn málimdedi. Onyń aitýynsha, áskeri jaǵdaidaǵy ásker shyǵarylǵan, al jaqyn arada Úkimet otyrysy ótedi.
Araǵa uzaq ýaqyt salmai el prezidenti áskeri jaǵdai engizgeni úshin halyqtan keshirim surady.
Ol budan bylai mundai qadamdarǵa barmaýǵa ýáde berdi.
"Shyn kóńilden halyqtan keshirim suraimyn", - dedi ol.
El prezidentiniń aitýynsha, mundai sharaǵa májbúrli túrde barǵan.
"Áskeri jaǵdai jariialaýǵa bailanysty jaýapkershilikten jaltarmaimyn", - dedi ol.
9 jeltoqsanda prezidentke Ońtústik Koreiadan shyǵýyna tyiym salyndy. Mundai shekteý elde áskeri jaǵdai engizý týraly jarlyqtan keiin qozǵalǵan búlik jónindegi isti tergeýge bailanysty qoldanylyp otyr dep habarlandy.
