2025 jyly qazanda Qazaqstanda infliatsiia 12,6 paiyzǵa jetti. Qymbatshylyq týrasynda qoǵamda túrli pikir bar. Sonyń biri - marketpleisterdiń áseri týraly pikir. Alaida sarapshylar men halyqaralyq zertteýler bul pikirdi joqqa shyǵarady. Bul týraly ranking.kz sarapshylary tarqatty, dep habarlaidy Dalanews.kz.
Marketpleister infliatsiiany emes, básekeni arttyrady
Qazir onlain saýda - Qazaqstandaǵy bólshek saýdanyń nebári 14 paiyzy. Onyń ishinde marketpleisterdiń úlesi odan da az. Demek, sarapshylardyń pikirinshe, infliatsiiaǵa áseri shekteýli.
"Kerisinshe marketpleister baǵanyń ashyqtyǵyn arttyryp, kásipkerler arasynda básekelestikti kúsheitedi. Bir taýardy birneshe satýshydan salystyra alý tutynýshyǵa tiimdi baǵa tańdaýǵa múmkindik beredi, al biznes ókilderi baǵany kóterýdiń ornyna servisti jaqsartýǵa tyrysady", - dep jazylǵan málimette.
Baǵany ustap turatyn faktorlar
Onlain saýda dástúrli dúkenderge qaraǵanda shyǵyndy azaitady: ǵimarat jaldamaidy, qyzmetkerler jáne deldaldar sany qysqarady. Bul baǵa kóterilýine tosqaýyl bolady.
"Sonymen qatar, marketpleisterdiń jeńildikteri, aktsiialary jáne promokodtary tutynýshylarǵa tiimdi usynystar jasaidy", - dep jazylǵan málimette.
Halyqaralyq zertteýler ne deidi?
Sarapshylar Eýropalyq ortalyq bank pen Polsha Ulttyq banki júrgizgen zertteýlerge súiengen. Málimet boiynsha elektron saýda infliatsiiany baiaýlatady.
-
Onlain tranzaktsiialar úlesi 1%-ǵa artqanda infliatsiia shamamen 0,03%-ǵa tómendeidi.
-
2004-2024 jyldar aralyǵynda elektron saýdanyń damýy baǵa deńgeiin orta eseppen 10%-ǵa tómendetken.
Qorytyndy
"Marketpleister baǵany ósiretin emes, kerisinshe turaqtandyratyn faktorǵa ainalyp otyr. Onlain saýda infliatsiiany údetpeidi, ol básekelestikti arttyryp, naryqty ashyq ári tiimdi etedi", - dep túiindedi sarapshylar.
Qysqasy, "marketpleister - baǵanyń jaýy emes, tutynýshynyń dosy", - deidi derekkóz.
