Mańǵystaý oblysy boiynsha Qarjylyq monitoring agenttiginiń departamenti onlain-kazino túrindegi zańsyz oiyn biznesin uiymdastyrdy degen kúdikke ilingen Rantik Bahtiiar Oglyǵa qatysty tergeý júrgizip jatyr, dep habarlaidy Dalanews.kz.
Oiyn platformasynyń jumysy úshin myńnan astam qumar oiyn túrine qoljetimdilik usynatyn «bingo37.pro» servisi paidalanylǵan.
Olardyń qatarynda «Crazy Monkey», «Keno», «Euro Game» jáne basqa da tanymal oiyndar bar.
Oiynshylardy tartý Telegram jáne WhatsApp messendjerleri arqyly júrgizilgen. Onda jarnamalyq, foto jáne beinematerialdar, túrli aktsiialar men bonýstyq baǵdarlamalar týraly usynystar taratylyp, qoldanýshylarda jeńil ári jyldam utysqa qol jetkizýge bolady degen túsinik qalyptastyrylǵan. Aqsha aýdarylǵannan keiin oiynshylarǵa platformaǵa kirýge arnalǵan loginder men qupiiasózder berilgen.
Oiynshylardan qarajat qabyldaý jáne qarjy aǵyndaryn jasyrý maqsatynda kúdikti Grýziia men Tájikstan azamattaryn - droperlerdi tartqan. Olar Qazaqstan aýmaǵyna ádeii kelip, bank shottary men abonenttik nómirlerdi tirkep, keiin olardy paidalanbai, qoljetimdilikti uiymdastyrýshyǵa tapsyrǵan.
Nátijesinde droperlerdiń atyna tirkelgen shottar arqyly 3,1 mlrd teńgeden astam qarajat túsken.
2025 jyldyń tamyz aiynda Bahtiiar Ogly R. halyqaralyq izdeýge jariialanyp, sot syrttai qamaýda ustaý túrindegi bultartpaý sharasyn sanktsiialaǵan.
2026 jyldyń qańtarynda ol Grýziia aýmaǵynda ustalyp, Qazaqstanǵa ekstraditsiialandy.
Sonymen qatar, úshinshi tulǵalardyń atyna rásimdelgen eki avtokólikke — PORSCHE CAYENNE jáne LEXUS GX 460 sot qaýlysymen memleket kirisine tárkilendi.Tergeý jalǵasýda.
QR Qylmystyq-protsestik kodeksiniń 201-babyna sáikes ózge aqparat jariia etýge jatpaidy.
