Qarjylyq monitoring agenttigi (QMA) onlain-kazino qyzmetine qatysty tergeý aiasynda taǵy bir blogerdi izdeýge jariialady. Bul joly agenttiktiń nazaryna 26 jastaǵy Mahmýd Hikmatov ilingen, dep habarlaidy dalanews.kz.
Jýrnalist Mihail Kozachkovtyń málimetinshe, Hikmatovqa qatysty izdeý úsh aidan astam ýaqyt buryn jariialanǵan. Ol zańsyz internet-kazinoǵa adamdardy tartty degen kúdikke ilingen «Pin Up» býkmekerlik keńsesine qatysty qylmystyq is boiynsha izdestirilip jatyr.
Derekkózdiń aitýynsha, «Pin Up» brendi áleýmettik jeliler men messendjerler arqyly belsendi túrde jarnamalanǵan. Bul naýqanǵa túrli tanymal tulǵalar, onyń ishinde buǵan deiin halyqaralyq izdeýge jariialanǵan bloger Qaisar Qamza da qatysqan bolýy múmkin. Al sol blogerlermen bailanys ornatýǵa jáne jumysty úilestirýge Mahmýd Hikmatov jaýap bergen degen boljam bar.
Alaida bul aqparat ázirge resmi túrde rastalǵan joq. Sebebi Hikmatovtyń ózi de Qazaqstannan ketip qalǵandyqtan, onyń bul iske qatysy naqty anyqtalmai otyr.
Mahmýd Hikmatov áleýmettik jelilerde asa tanymal bolmaǵanymen, tabys tabýdyń túrli joldaryn izdegen. Ol pop-MMA jekpe-jekterine qatysqan. Ashyq derekterge sáikes, onyń mundai týrnirlerdegi kórsetkishi – úsh jekpe-jek jáne úsh jeńilis.
Sondai-aq bloger bir kezderi erekshe jarnamalyq usynysymen de jurt nazaryn aýdarǵan. Ol óz denesine kez kelgen jarnamany tatýirovka retinde saldyrýǵa daiyn ekenin aityp, bul qyzmeti úshin 30 million teńge suraǵan. Hikmatov jarnama úshin salynǵan tatýirovkany óshirmeitinin málimdegen. Keiin bul usynysqa kelisken tapsyrys berýshi de tabylǵany aitylǵan.
