Áleýmettik jelide oblystyq onkologiialyq ortalyqtaǵy jaǵdaiǵa qatysty jariialanǵan jazba qyzý talqylanýda, dep habarlaidy dalanews.kz.
Turǵyn tanysyn aýrýhanaǵa jatqyzýǵa birge barǵannan keiin kórgen jaǵdaiyn ashyq jazyp, densaýlyq saqtaý júiesindegi ózekti máselelerdi kóterdi.
Avtordyń aitýynsha, onkologiialyq naýqastardyń bir bóligi tekserýden ótip, em qabyldap, operatsiiaǵa daiyndyq jumystaryn konteinerlik ǵimarattarda ótkizýde.
«2026 jyl bolsa da, ózińdi Keńes dáýirine nemese dala gospitaline kelgendei sezinesiń», – deidi ol.
Jazbada qabyldaý bóliminde konditsionerdiń joqtyǵy, bólmeniń tym qapyryq ekeni aitylǵan. Mundai jaǵdaidyń aýyr em qabyldap júrgen naýqastar úshin tipti qiyn ekenine nazar aýdarylady.
Sonymen qatar elektrondy kezek júiesi jumys istemegendikten, kelýshiler aty-jónderin qaǵazǵa qolmen jazyp, qabyldaýdy eki saǵattan astam kútken. Aýrýhana aýlasynda naýqastar men olardy alyp kelgen azamattar oryndyq jetispegendikten, aǵash palletterdiń ústinde nemese jerge otyryp kútýge májbúr bolǵan.
Taǵy bir másele – bailanysqa shyǵýdyń qiyndyǵy. Avtordyń sózinshe, qoldaý qyzmetiniń qalalyq telefon nómirleri istemegen, tek uialy bailanys arqyly ǵana habarlasýǵa múmkindik bolǵan.
Mekeme qyzmetkerleri qaita jańǵyrtýǵa arnalǵan jobalyq-smetalyq qujattamaǵa qol qoiylǵanyn, alaida qurylys jumystarynyń naqty qashan bastalatyny belgisiz ekenin aitqan. Sondai-aq konteinerlik ǵimarattar memlekettik qarjyǵa emes, meditsinalyq mekemeniń óz qarajaty esebinen ornatylǵany habarlanǵan.
Osydan keiin avtor Densaýlyq saqtaý ministrligine birqatar saýal joldaidy. Onyń pikirinshe, ómiri úshin kúresip júrgen adamdar eń aldymen laiyqty jaǵdaida em qabyldaýy tiis.
Aita keteiik, bul jariialanym áleýmettik jelidegi turǵynnyń jeke jazbasyna negizdelgen. Resmi organdar ázirge atalǵan jaǵdaiǵa qatysty pikir bildirgen joq.
