ەلەۋمەتتٸك جەلٸدە وبلىستىق ونكولوگييالىق ورتالىقتاعى جاعدايعا قاتىستى جارييالانعان جازبا قىزۋ تالقىلانۋدا, دەپ حابارلايدى dalanews.kz.
تۇرعىن تانىسىن اۋرۋحاناعا جاتقىزۋعا بٸرگە بارعاننان كەيٸن كٶرگەن جاعدايىن اشىق جازىپ, دەنساۋلىق ساقتاۋ جٷيەسٸندەگٸ ٶزەكتٸ مەسەلەلەردٸ كٶتەردٸ.
اۆتوردىڭ ايتۋىنشا, ونكولوگييالىق ناۋقاستاردىڭ بٸر بٶلٸگٸ تەكسەرۋدەن ٶتٸپ, ەم قابىلداپ, وپەراتسيياعا دايىندىق جۇمىستارىن كونتەينەرلٸك عيماراتتاردا ٶتكٸزۋدە.
«2026 جىل بولسا دا, ٶزٸڭدٸ كەڭەس دەۋٸرٸنە نەمەسە دالا گوسپيتالٸنە كەلگەندەي سەزٸنەسٸڭ», – دەيدٸ ول.
جازبادا قابىلداۋ بٶلٸمٸندە كونديتسيونەردٸڭ جوقتىعى, بٶلمەنٸڭ تىم قاپىرىق ەكەنٸ ايتىلعان. مۇنداي جاعدايدىڭ اۋىر ەم قابىلداپ جٷرگەن ناۋقاستار ٷشٸن تٸپتٸ قيىن ەكەنٸنە نازار اۋدارىلادى.
سونىمەن قاتار ەلەكتروندى كەزەك جٷيەسٸ جۇمىس ٸستەمەگەندٸكتەن, كەلۋشٸلەر اتى-جٶندەرٸن قاعازعا قولمەن جازىپ, قابىلداۋدى ەكٸ ساعاتتان استام كٷتكەن. اۋرۋحانا اۋلاسىندا ناۋقاستار مەن ولاردى الىپ كەلگەن ازاماتتار ورىندىق جەتٸسپەگەندٸكتەن, اعاش پاللەتتەردٸڭ ٷستٸندە نەمەسە جەرگە وتىرىپ كٷتۋگە مەجبٷر بولعان.
تاعى بٸر مەسەلە – بايلانىسقا شىعۋدىڭ قيىندىعى. اۆتوردىڭ سٶزٸنشە, قولداۋ قىزمەتٸنٸڭ قالالىق تەلەفون نٶمٸرلەرٸ ٸستەمەگەن, تەك ۇيالى بايلانىس ارقىلى عانا حابارلاسۋعا مٷمكٸندٸك بولعان.
مەكەمە قىزمەتكەرلەرٸ قايتا جاڭعىرتۋعا ارنالعان جوبالىق-سمەتالىق قۇجاتتاماعا قول قويىلعانىن, الايدا قۇرىلىس جۇمىستارىنىڭ ناقتى قاشان باستالاتىنى بەلگٸسٸز ەكەنٸن ايتقان. سونداي-اق كونتەينەرلٸك عيماراتتار مەملەكەتتٸك قارجىعا ەمەس, مەديتسينالىق مەكەمەنٸڭ ٶز قاراجاتى ەسەبٸنەن ورناتىلعانى حابارلانعان.
وسىدان كەيٸن اۆتور دەنساۋلىق ساقتاۋ مينيسترلٸگٸنە بٸرقاتار ساۋال جولدايدى. ونىڭ پٸكٸرٸنشە, ٶمٸرٸ ٷشٸن كٷرەسٸپ جٷرگەن ادامدار ەڭ الدىمەن لايىقتى جاعدايدا ەم قابىلداۋى تيٸس.
ايتا كەتەيٸك, بۇل جارييالانىم ەلەۋمەتتٸك جەلٸدەگٸ تۇرعىننىڭ جەكە جازباسىنا نەگٸزدەلگەن. رەسمي ورگاندار ەزٸرگە اتالعان جاعدايعا قاتىستى پٸكٸر بٸلدٸرگەن جوق.
