Túrkistan qalasynda otyrarlyq ónerpazdar óner kórsetti. «Ónerli ólke» oblystyq óner festivali aiasynda «Kerýen sarai» týristik kesheninde ótken gala-kontsertke aýdannan shyqqan tanymal tulǵalardyń týyndylary men kúmbirlegen kúi, myń buralǵan bi de kórinis tapty, – dep habarlaidy Dalanews.kz Túrkistan oblysy ákiminiń baspasóz qyzmetine silteme jasap.
Merekelik jiynda aýdan ákiminiń orynbasary Aidos Qulmahanov sóz alyp, qasietti qala turǵyndary men qonaqtaryn quttyqtady.
– Ejelden «Ulylardyń Otany» sanalǵan kieli Otyrar óńiri óziniń kóptegen talantty, daryndy perzentterimen maqtana alady. Keshegi ǵulama ǵalym Ábý Nasyr Ál-Farabi men rýh sardary Ózbekáli Jánibekov, til janashyry Ómirzaq Aitbaiuly, Álem aqyny Muhtar Shahanov, án padishasy Shámshi Qaldaiaqov, kúsh atasy Qajymuqan Muńaitpasov, aitystyń aqbereni Táýshen Ábýova, halyq aqyny Áselhan Qalybekova sekildi tulǵalar sózimizdiń dáleli bolary anyq. Búginde uly tulǵalarymyzdyń izin basyp kele jatqan talantty jastarymyz da az emes.
Kesh barysynda satira sardarlary Ýálibek Ábdiraiymov pen Júsip Aqshora, «Altyn dombyra» iegeri Bekarys Shoibekov pen aitys aqtańgeri Anar Japparqulova jáne án óneriniń juldyzdary Hadisha Shalabaeva, Berik Seksenbek, Ermahan Áshirov arnaiy qonaq bolyp, «Baqyt aidynynda» bishileri, «Bastaý» toby men «Qyzdar» triosy jáne taǵy basqa aýdan ónerpazdarymen birge óner kórsetti. Keshti belgili jýrnalist Qaiyrhan Máýlen men Gúlimqulja Seitqazy júrgizdi.
