CLAAS traktorlary men kombaındarynyń quramdas bólikterin shyǵarý, AMAZONE tuqym sebý keshenderin óndirý jáne KamLit pen KIA kompanıalarymen seriktestik aıasynda Qazaqstanda alǵashqy Lokalızasıalyq ortalyq iske qosyldy. Qostanaı mashına jasaýshylarynyń biliktiligi arqasynda AGROMASH zaýyty bıyl álemdik iri kompanıalarmen jumys isteýdi bastady, dep habarlaıdy Dalanews.kz.
2024 JYLDYŃ QORYTYNDYSY
Óndiris 20%-ǵa ósti
«2023 jyly kásiporyn 1250 birlik aýylsharýashylyǵy tehnıkasyn shyǵarsa, 2024 jyly bul kórsetkish 1500 birlikke jetti. Sonymen qatar traktorlar óndirisi aıtarlyqtaı artty: olardyń sany 1 100 birlikten asty. LOVOL traktorlary úsh jyl qatarynan eldegi eń kóp satylatyn traktorlardyń qatarynda bolsa, bıyl ESSIL brendi kombaındar arasynda kósh bastap tur», – dedi komersıalyq dırektor Nıkolaı Parhomenko.
ÓNDİRİS: CLAAS TEHNIKASY JÁNE AMAZONE KESHENDERİ
Jyl saıyn Lokalızasıalyq ortalyqta 250 myńnan astam toraptar men komponentter óndiriledi, olardyń bir bóligi zaýyttyń óz quıý sehynda daıyndalady.
Qostanaılyq mashına jasaýshylardyń aıtýynsha, zamanaýı jabdyqtar men bilikti mamandardyń bolýy qazaqstandyq aýyl sharýashylyǵy jáne komersıalyq tehnıka óndirýshilerine ónerkásiptik qurastyrý kelisimderin oryndaýǵa múmkindik beredi. Búginde LOVOL jáne DEUTZ-FAHR traktorlary men kombaındary, ESSIL kombaındary, sondaı-aq basqa da tirkemeler men qondyrmalar AGROMASH óndiristik jelisinen shyǵarylady. Budan bólek, kásiporyn CLAAS, AMAZONE jáne KIA syndy álemdik brendterge qajetti bólshekterdi jasap jetkizedi.
«Lokalızasıalyq ortalyqtyń múmkindikteri arqasynda kompanıa CLAAS traktorlary men kombaındaryna tasymaldaýshy arbalar, aldyńǵy júk kótergishter, satylar, tutqalar jáne basqa da bólshekter shyǵarady. Kelesi jyly bul tizimdi keńeıtý josparlanǵan. Sonymen birge, qyrkúıek aıynda AMAZONE kompanıasymen tirkemeli jáne soqpaly tehnıka óndirý boıynsha kelisim jasaldy. Bizdiń mamandar nemis áriptesterimizden oqytý baǵdarlamasyn ótti, al óndiris zaýyt aýmaǵynda bastaldy. Jańa maýsymda qazaqstandyq fermerler 12 jáne 15 metrlik tuqym sebý keshenderin otandyq óndiristen ala alady. 2025 jylǵa jospar boıynsha – 50 keshen óndirý kózdelip otyr. Sonymen qatar, KIA zaýyty bizben birge Qazaqstan aýmaǵynda jańa óndiris ornyn qurý úshin quramdas bólshekterdi daıyndaý boıynsha kelisim jasasty. Biz quıý, dánekerleý, boıaý jáne daıyn bólshekter shyǵarý sıklin tolyqtaı qamtıtyn óndiris qyzmetterin usynamyz», – dedi AGROMASH zaýytynyń operasıalyq tıimdilik jónindegi dırektory Bahtıar Balgýjın.
2025 JYL – QYZMET KÓRSETÝ JYLY
AGROMASH kompanıasy 2025 jyldy resmı túrde Qyzmet kórsetý jyly dep jarıalady. Bul sheshim servıstik qyzmet kórsetý salasyn keńeıtý jáne jaqsartý maqsatynda qabyldandy.
Servıstik qyzmetti túrlendirý jumystary osy maýsymda bastaldy. Qazaqstandyq óndiristegi 100-ge jýyq JAC T6 avtokóligi holdıńtiń fılıaldaryna satyp alyndy. Bul kólikter servıstik mamandardyń fermerler suranysyna jedel jaýap berýin qamtamasyz etedi. Kompanıa ınfraqurylymdy jańǵyrtýǵa jáne tehnıkalyq jabdyqtaryn jaqsartýǵa 5 mıllıard teńge kóleminde ınvestısıa bóldi.
«Bıyl biz 100-den astam avtokólik satyp aldyq. Árbir kólik zamanaýı jabdyqtarmen qamtylǵan. Bul bizdiń mamandarǵa fermerlerdiń suranysyn jyldam qanaǵattandyrýǵa jáne aýyl sharýashylyǵy tehnıkasyna qyzmet kórsetý sapasyn arttyrýǵa múmkindik beredi. Qazirgi ýaqytta 4 myńnan astam traktor men kombaın bizdiń kepildi jáne kepildikten keıingi qyzmet kórsetý júıemizde tur. Satý kólemi maýsym saıyn artyp keledi, sondyqtan biz tehnıkalyq jańǵyrtý jumystaryn úzdiksiz júrgizýimiz qajet», – dedi qyzmet kórsetý jáne qosalqy bólshekter bóliminiń dırektory Samat Jambetaýlın.
2025 jyly kompanıa elimizdiń basty astyqty aımaqtarynda – Qostanaı, Óskemen, Astana, Shymkent, Pavlodar, Almaty jáne Qaraǵandy qalalarynda servıstik fılıaldaryn modernızasıalap, jańa núkteler ashýdy josparlap otyr. Bul fılıaldar tolyqqandy sheberhanalar men qosalqy bólshekter qoımalarymen jabdyqtalatyn bolady.
