Qazaqstanda óndiristik jaraqattardyń aýyrlyǵyn baǵalaýdyń biryńǵai tártibin engizý josparlanyp otyr, dep habarlaidy dalanews.kz.
Densaýlyq saqtaý ministrligi tiisti buiryq jobasyn qoǵamdyq talqylaýǵa shyǵardy. Qujat «Ashyq NQA» portalynda jariialanǵan, usynystar men eskertýler 2026 jylǵy 19 tamyzǵa deiin qabyldanady.
Jobaǵa sáikes, dárigerler óndiristik jaraqattyń aýyrlyǵyn biryńǵai ólshemder boiynsha baǵalaidy. Atap aitqanda, jaraqattyń sipaty men aýyrlyǵy, ómirge tóngen qaýip, ýaqytsha eńbekke jaramsyzdyq merzimi, eńbekke qabilettiliktiń turaqty nemese kásibi joǵalýy, aýrýhanaǵa jatqyzý, operatsiia nemese reanimatsiialyq kómek qajettiligi jáne jaraqattyń uzaq merzimdi saldary eskeriledi.
Ministrlik mundai qorytyndy jazataiym oqiǵany ári qarai tergeý kezinde mańyzdy ról atqaratynyn atap ótti. Aýyr nemese adam ólimine ákelgen, sondai-aq toptyq óndiristik oqiǵalar boiynsha arnaiy komissiia qurylyp, oqiǵanyń sebepteri men eńbek qyzmetimen bailanysyn anyqtaidy.
Joba ótemaqy, saqtandyrý tólemderi nemese járdemaqylar mólsherin ózgertýdi kózdemeidi. Negizgi jańashyldyq - óndiristik jaraqattardy baǵalaýdyń biryńǵai meditsinalyq tásilin engizý. Sonyń nátijesinde uqsas jaǵdailar birdei kriteriiler boiynsha baǵalanatyn bolady.
Ministrlik óndiriste jaraqat alǵan azamattarǵa oqiǵa týraly jumys berýshige dereý habarlap, meditsinalyq kómekke júginýdi, meditsinalyq qorytyndylardy saqtaýdy jáne tergeý materialdarymen tanysýdy usynady.
