Oljas Bektenov SQO-da egis qorytyndysymen, mal sharýashylyǵy jáne aýyl sharýashylyǵy mashinasyn jasaý salasynyń damýymen tanysty

Qazaqstan Premer-Ministri Oljas Bektenov Soltústik Qazaqstan oblysyna jumys sapary barysynda óńirdegi egis naýqanynyń qorytyndysymen tanysyp, diqandarmen jáne malshylermen kezdesti, sondai-aq aýyl sharýashylyǵy tehnikasyn óndirý zaýytynda boldy.

Úkimet basshysy «Daiyndyq Agro» JShS alqaptaryn aralap kórdi. Seriktestik biyl 7,5 myń gektarǵa jýyq alqapqa egin sepken. Memleket basshysynyń dara daqyldy egisten bas tartý maqsatynda aýyl sharýashylyǵy daqyldaryn ártaraptandyrý jónindegi tapsyrmasyna sáikes, biyl mal azyǵyna arnalǵan alqaptar 3 esege ulǵaityldy.

Iri agroqurylymdardyń ókilderimen kezdesýde egis naýqany máseleleri jáne AÓK-ti qoldaý sharalary talqylandy. Óńir jyl saiyn eldegi jalpy astyq kóleminiń 25%-na deiin jáne maily daqyldardyń úshten birin qamtamasyz etý arqyly osy salada kóshbasshy bolyp otyr. Egis naýqany jaqyn kúnderi tolyǵymen aiaqtalady. Búgingi tańda 2,3 mln ga alqapqa josparlanǵan mineraldy tyńaitqysh kóleminiń 65%-y engizildi. Atalǵan is-sharalarmen barlyǵy 3 mln ga egis alqaby qamtylady.

Jalpy, elimizdiń diqandary kóktemgi egis jumystaryn ýaqytyly ári sapaly ótkizý maqsatynda barlyq qajetti resýrstarmen qamtamasyz etilgeni atap ótildi. Máselen, Azyq-túlik korporatsiiasy 6,4 mlrd teńgege 44,8 myń tonna bidai kóleminde tuqymdyq materialǵa taýarlyq nesie berdi. Litri 250 teńge bolatyn 376 myń tonna jeńildikti dizel otyny bólindi, bul naryqtyq baǵadan 15%-ǵa tómen. Otandyq tyńaitqyshtar úshin 60% ulǵaitylǵan normativti kózdeitin avanstyq sýbsidiialaýdyń jańa tetigi engizildi. Otandyq tyńaitqysh óndirýshilermen bólip tóleý máselesi pysyqtaldy.

«Biz búginde álemdik naryqta suranysqa ie ekologiialyq taza, tabiǵi aýyl sharýashylyǵy ónimderin óndiremiz. Memleket tarapynan agroónerkásip keshenine jeńildetilgen nesie berý jáne sýbsidiialaý túrinde úlken qoldaý kórsetilip jatyr, olardyń kólemi jyldan jylǵa artyp keledi. Sonymen qatar aýyl sharýashylyǵynda shyǵarylatyn barlyq ónimdi óńdeý jáne eksporttaý mańyzdy. Ol úshin eńbek ónimdiligin turaqty túrde arttyryp, jańa tehnologiialar men tásilderdi engizý qajet», — dep atap ótti Oljas Bektenov.

Memleket basshysynyń tapsyrmasy boiynsha byltyr zamanaýi sút-taýar fermalaryn salýǵa 100 mlrd teńge jeńildetilgen nesie qarajaty bólingen bolatyn. Taýar óndirýshilerge tek sút óndirý men ótkizý úshin sýbsidiia túrinde jyl saiyn 24 mlrd teńgege jýyq qarjy aýdarylady. Premer-Ministr «Ivan Zenchenko» iri sút-taýar fermasynyń mysalynda óńirdiń sút ónerkásibiniń áleýetin odan ári keńeitý máselesine basa nazar aýdardy. Onda tehnologiialyq protsester men shyǵarylatyn ónim túrleri qaraldy. SQO-da elimizde shyǵarylatyn súttiń jalpy kóleminiń 13%-dan astamy óndiriledi.

Malshylar kúni kásibi merekesi qarsańynda Oljas Bektenov óńirdegi iri mal sharýashylyǵy ókilderimen kezdesip, olarmen salany odan ári damytý keleshegin talqylap, aýyl sharýashylyǵy jalpy óniminiń 49%-dan astamy mal sharýashylyǵynyń úlesine tiesili ekenin atap ótti.

Soltústik Qazaqstan oblysynda Oljas Bektenov nemis tehnologiiasy boiynsha aýyl sharýashylyǵy tehnikasy qurastyrylatyn CLAAS zaýytynda boldy. Kásiporyn suranysqa ie kóptegen aýyl sharýashylyǵy tehnikalaryn shyǵarady. Biyl naryqty 523 jańa tehnikamen, atap aitsaq: 103 traktor, 180 kombain, 165 destelegishpen jáne 75 egis keshenimen qamtamasyz etý josparlanyp otyr.

«Qazaqstandyq fermerler arasynda joǵary sapaly aýyl sharýashylyǵy tehnikasyna suranys artyp keledi. Endi kompaniianyń mindeti – óndiristi lokalizatsiialaý deńgeiin jyl saiyn arttyrý. Ónerkásip jáne qurylys ministrligi bul máseleni baqylaýda ustaýy tiis», — dedi Oljas Bektenov.