Qazaqstan Respýblikasynyń Premer-ministri Oljas Bektenov Batys Qazaqstan oblysyna jumys sapary aiasynda Oral qalasynyń kommýnaldyq-energetikalyq sektoryndaǵy birqatar nysandy aralap, infraqurylymdy jańǵyrtý jumystarynyń barysymen tanysty, dep habarlaidy Dalanews.kz.
Sapar barysynda Úkimet basshysy 1961 jyldan beri jumys istep turǵan "Batys Sý Arnasy" sýmen jabdyqtaý jáne sý burý kásipornynda boldy. Oral qalasy aýyz sýdy negizinen Jaiyq ózeni jáne jerasty kózderinen alady. Premer-Ministrge 2023 jyly 6 sý uńǵymasynyń qurylysy aiaqtalǵany týraly baiandaldy. Sondai-aq qazir jumys istep turǵan sý tazartý qondyrǵysynyń ábden tozyǵy jetken.
Oljas Bektenov óńir basshylyǵynyń nazaryn turǵyndar tarapynan, ásirese jaz ailarynda aýyz sý tapshylyǵyna qatysty aryz-shaǵymdarǵa aýdaryp, sý tazartý júiesin rekonstrýktsiialaýǵa bailanysty JSQ ázirleýdi jyl sońyna deiin aiaqtaýdy tapsyrdy. Onyń óndiristik qýatyn táýligine 50 myń tekshe metrge deiin arttyrý kerek. Úkimet qajetti qoldaý kórsetetin bolady.
Sýmen jabdyqtaý jelilerin (tozý – 60,5%), sý burýdy (tozý – 61,3%) jańǵyrtýdy jedeldetý, sondai-aq káriz-sorǵy stansalaryn rekonstrýktsiialaý boiynsha birqatar tapsyrma berildi.
Sonymen qatar Premer-Ministr qaýipti qyzyl aimaqta ornalasqan "Jaiyqjylýenergo" AQ elektr jáne jylý energiiasyn óndirý kásipornynyń aǵymdaǵy jaǵdaimen tanysty. Kásiporynda Oljas Bektenov bas dispetcherlik bólmeni, týrbina zaly men qazandyqty aralap kórdi.
Búgingi tańda úsh qazandyq agregaty (№2,4,9) men týrbinany jóndeý jumystary aiaqtaldy, 16,5 shaqyrym jylý jelileri jóndeldi. Sonymen qatar úsh energetikalyq qazandyq pen №3 týrbinany kezeń-kezeńimen aýystyrý jobasyn ázirleý jumystary bastaldy. Bul sharalar búkil stansa jumysynyń senimdiligin arttyrýǵa baǵyttalǵan.
"Memleket basshysy atap ótkendei, eldi mekenderdiń tynys-tirshiligine qajetti barlyq júieniń úzdiksiz jumys isteýin qamtamasyz etý – Úkimet pen ákimdikterdiń negizgi mindetteriniń biri. Respýblika boiynsha JEO tozýy 66%-dy, al Oral qalasynda 86%-dy qurap otyr. Jobalyq-smetalyq qujattama qalai daiyn bolady, ákimdik tiisti ótinimdi engizýi tiis. Ony qarap, kezeń-kezeńimen sheshemiz", — dedi Oljas Bektenov.
Sondai-aq Úkimet basshysyna taýarlyq gaz óndirisin arttyrý jáne óńirdi gazdandyrý barysy boiynsha júrgizilip jatqan jumystar týraly baiandaldy.
Sonymen qatar jylytý maýsymyn eskere otyryp, óńir basshylyǵyna eldi mekenderdiń tynys-tirshiligine qajetti barlyq júieniń úzdiksiz jumys isteýin qamtamasyz etýdi erekshe baqylaýda ustaý tapsyryldy.
Anyqtama: Elimiz boiynsha JEO-nyń ortasha tozýy 66%-dy qurap otyr. Memleket basshysynyń qyzyl aimaqta ornalasqan 19 JEO-da tozý deńgeiin azaitý jónindegi tapsyrmasyn iske asyrý sheńberinde 28 qazandyq pen 16 týrbinaǵa kúrdeli jóndeý jumystary júrgizilýde. 2024 jyly elimizdiń jylý kózderinde barlyǵy 10 energoblokty, 55 qazandyqty jáne 45 týrbinany jóndeý josparlanǵan.
