Astanada memleket menshigine qaitarylǵan qymbat jyljymaityn múlik nysandarynyń biri – «Parijskii kvartal» turǵyn úi keshenindegi eki deńgeili páter satylymǵa shyǵaryldy, dep habarlaidy dalanews.kz.
Elektrondy saýda alańynda jariialanǵan aqparatqa sáikes, lot retinde jalpy aýdany 309,5 sharshy metr bolatyn №6 eki deńgeili páter usynylǵan. Nysan Astana qalasynyń Almaty aýdanynda, Sharl de Goll kóshesi, 5-úi mekenjaiynda ornalasqan.
Páterdiń bastapqy baǵasy 363,2 mln teńge bolyp belgilengen. Saýda-sattyq konkýrs túrinde ótkiziledi. Qatysý úshin 54,4 mln teńge kóleminde kepildik jarna tóleý qajet. Ótinim qabyldaý 2026 jylǵy 22 qyrkúiek kúni saǵat 09:55-te aiaqtalyp, saýda sol kúni saǵat 10:00-de bastalady.
Lot sipattamasynda páterdiń turǵyn aýdany 155,7 sharshy metr ekeni kórsetilgen. Nysan 2012 jyly salynǵan turǵyn úi kesheninde ornalasqan. Sondai-aq qujattarda kommýnaldyq tólemder boiynsha bereshektiń bar ekeni jazylǵan.
Satýshy retinde «Qaitarylǵan aktivterdi basqarý kompaniiasy» JShS kórsetilgen. Aýktsion qujattaryna sáikes, saýdaǵa jalǵyz qatysýshy tirkelgen jaǵdaida da nysandy satý múmkindigi qarastyrylǵan.
Aita keteiik, sońǵy jyldary memleketke qaitarylǵan aktivter qataryndaǵy elitalyq jyljymaityn múlikter kezeń-kezeńimen ashyq saýdaǵa shyǵarylyp keledi. Osy páter de sondai nysandardyń qataryna jatady.
