استانادا مەملەكەت مەنشٸگٸنە قايتارىلعان قىمبات جىلجىمايتىن مٷلٸك نىساندارىنىڭ بٸرٸ – «پاريجسكيي كۆارتال» تۇرعىن ٷي كەشەنٸندەگٸ ەكٸ دەڭگەيلٸ پەتەر ساتىلىمعا شىعارىلدى, دەپ حابارلايدى dalanews.kz.
ەلەكتروندى ساۋدا الاڭىندا جارييالانعان اقپاراتقا سەيكەس, لوت رەتٸندە جالپى اۋدانى 309,5 شارشى مەتر بولاتىن №6 ەكٸ دەڭگەيلٸ پەتەر ۇسىنىلعان. نىسان استانا قالاسىنىڭ الماتى اۋدانىندا, شارل دە گولل كٶشەسٸ, 5-ٷي مەكەنجايىندا ورنالاسقان.
پەتەردٸڭ باستاپقى باعاسى 363,2 ملن تەڭگە بولىپ بەلگٸلەنگەن. ساۋدا-ساتتىق كونكۋرس تٷرٸندە ٶتكٸزٸلەدٸ. قاتىسۋ ٷشٸن 54,4 ملن تەڭگە كٶلەمٸندە كەپٸلدٸك جارنا تٶلەۋ قاجەت. ٶتٸنٸم قابىلداۋ 2026 جىلعى 22 قىركٷيەك كٷنٸ ساعات 09:55-تە اياقتالىپ, ساۋدا سول كٷنٸ ساعات 10:00-دە باستالادى.
لوت سيپاتتاماسىندا پەتەردٸڭ تۇرعىن اۋدانى 155,7 شارشى مەتر ەكەنٸ كٶرسەتٸلگەن. نىسان 2012 جىلى سالىنعان تۇرعىن ٷي كەشەنٸندە ورنالاسقان. سونداي-اق قۇجاتتاردا كوممۋنالدىق تٶلەمدەر بويىنشا بەرەشەكتٸڭ بار ەكەنٸ جازىلعان.
ساتۋشى رەتٸندە «قايتارىلعان اكتيۆتەردٸ باسقارۋ كومپانيياسى» جشس كٶرسەتٸلگەن. اۋكتسيون قۇجاتتارىنا سەيكەس, ساۋداعا جالعىز قاتىسۋشى تٸركەلگەن جاعدايدا دا نىساندى ساتۋ مٷمكٸندٸگٸ قاراستىرىلعان.
ايتا كەتەيٸك, سوڭعى جىلدارى مەملەكەتكە قايتارىلعان اكتيۆتەر قاتارىنداعى ەليتالىق جىلجىمايتىن مٷلٸكتەر كەزەڭ-كەزەڭٸمەن اشىق ساۋداعا شىعارىلىپ كەلەدٸ. وسى پەتەر دە سونداي نىسانداردىڭ قاتارىنا جاتادى.
