Dalanews.kz osy oraida Almaty oblysyndaǵy erligimen aty shyqqan órt sóndirýshilerge toqtalyp, olardy oqyrmanǵa tanystyra ketkendi jón kórdi.
Almaty oblysynyń Alakól aýdany Aqshi eldi-mekeninde ornalasqan oblystyq Tótenshe jaǵdai basqarmasyna qarasty Jedel qutqarý otriadynyń bólimshesinde ter tógip júrgen mamandar kúlli aýdan halqyna tanymal.
Bólimshe jetekshisi Marat Smaǵulov órt sóndirý salasynda shirek ǵasyrdan beri eńbek etedi. Sonaý 1997 jyly "azamattyq qorǵaý júiesine adal qyzmet etemin" dep ant bergen Marat myrza kúni búginge deiin sertine berik ekenin dáleldep keledi.
Ótken jyldyń jeltoqsan aiy men ústimizdegi jyldyń qaqaǵan qańtary aralyǵynda Smaǵulov basqarǵan brigada 4 birdei jedel qutqarý operatsiiasyna atsalysyp, úskirik aiazda qarǵa kómile jazdaǵan 30 adamdy ajaldan arashalap qaldy.
Qańtardyń bel ortasynda, saqyrlaǵan sary aiazda atyshýly "Úsharal-Dostyq" kólik jolynyń asa kúrdeli bóliginde qabat-qabat júk tiegen 9 aýyr kólik pen jol talǵamaityn djip qalyń qardyń qursaýynda qalyp qoiady.
Sol kúni jeldiń jyldamdyǵy saǵatyna 20-23 m\s jetip, daýyldan dala kórinbei qalady. Soǵan qaramastan qutqarýshylar ábden qursaýlanyp qalǵan qardyń kóbesin arnaiy tehnikamen, keibir tusynda qoldaryna qaila, kúrek alyp óz kúshterimen buzyp, eki táýlik boiy jabylyp qalǵan joldy arshyp shyǵady.
Eń bastysy eńbek esh ketpeidi. Áreket túbi bereket degen, qutqarýshylardyń qajyr-qabileti men erik-jigeriniń nátijesinde Marat Smaǵulov bastaǵan brigada 15 adamdy qutqaryp, olardy qaýipsiz jerge jetkizedi.
Osy jolǵy shomylý maýsymynda Marat Smaǵulov demalýǵa kelgen qaýymdy jiti baqylaidy. Ainaldyrǵan eki aidyń ishinde onyń jetekshiligimen 18 qutqarý operatsiiasy uiymdastyrylyp, sonyń arqasynda sýǵa kete jazdaǵan 20 azamat qutqarylǵan eken. Ózgeniń ǵumyry úshin óz ómirin qaterge tigýden taiynbaityn Marat Smaǵulov Memleket basshysy Qasym-Jomart Toqaevtyń Jarlyǵymen "Erligi úshin" medalimen marapattaldy.
...
Azamattyq qorǵaý salasynda egemendik alǵan eleń-alań jyldary ómirge kelgen Táýelsizdik qurdastary kóptep ter tógip júr. Sonyń biri Almaty oblysy Tótenshe jaǵdai departamentine qarasty Tekeli qalasynyń 15-shi órt sóndirý bóliminde isteitin Eldar Bókenbai. 1991 jyldyń kúzinde ómirge kelgen Eldar osy bólimdegi tájiribeli órt sóndirýshilerdiń biri.
Buǵan myna bir oqiǵa dálel:
Qyrkúiektiń bas kezinde qaladaǵy órt sóndirý bólimine kópqabatty páterdi órt shalǵany týraly shuǵyl habarlama kelip túsedi. Tórt qabatty úidiń úshinshi qabatynda ornalasqan páterdiń birinde elektr jabdyǵy kúiip, tutas as úi otqa oranady.
Saldarynan úshinshi jáne tórtinshi qabatta turatyn turǵyndar syrtqa shyǵa almai, óz úilerinde qamalyp qalady. Bul tusta kireberisti qoiý tútin qaýmalap alǵan bolatyn.
Alaida Eldar Bókenbai saspaidy. Jedel sheshim qabyldap, tórtinshi qabatqa baspaldaq qoidyrady. Onymen shuǵyl joǵaryǵa kóterilip, tunshyǵa jazdaýǵa sál-aq qalǵan kelinshek pen onyń áli kámelet jasqa tolmaǵan qos búldirshinin ajaldan arashalap qalady.
...
Azamattyq qorǵaý salasynyń aǵa serjanty Ardan Baiǵojan Taldyqorǵandaǵy №1 órt sóndirý bólimshesinde isteidi. Ári qutqarýshy, ári órt sóndirý qyzmetin qatar meńgergen Ardan óz áriptesteriniń arasynda syily, odan osy salaǵa endi-endi aiaq basqan jas mamandar úlgi alady.
Ústimizdegi jyldyń qańtar aiynda osynaý bólimshege qaladaǵy yqsham aýdannyń birinde ornalasqan kópqabatty páterde alapat órt shyqqany týraly habar túsedi. Oqiǵa ornyna Ardan Baiǵojan bastaǵan №1 órt sóndirý bóliminiń eki brigadasy attanady.
Bul tusta tórtinshi qabatta tutanǵan órt basqa da páterlerge tarai bastaǵan edi. Órt sóndirýshiler jedel barlaý júrgizip, páterde turǵyndardyń qalyp qoiǵanyn anyqtaidy.
Osy tusta Ardan Baiǵojan daǵdaryp turǵan áriptesterine jol kórsetip, páterde qamalyp qalǵan azamattardy jedel qutqarýǵa qatysty josparyn usynady. Sonyń nátijesinde kópqabatty úiden eki eresek azamat pen bir búldirshin qutqaryldy. Al órt kóp uzamai aýyzdyqtaldy
Ardan Baiǵojannyń erligi Tótenshe jaǵdai ministrligi tarapynan árdaiym eskerilip otyrady. Máselen osydan úsh jyl órt sóndirýshi III-shi dárejeli "Minsiz qyzmeti úshin" medalimen marapattaldy. Al biylǵy jyly "Tótenshe jaǵdai salasyndaǵy eren erligi úshin" tósbelgisin keýdesine taqty.
...
Azamattyq qorǵaý salasynda kúni keshe oqýyn aiaqtap, úlken ómirge aiaq basqan jas mamandar da barshylyq. Solardyń biri Taldyqorǵan qalasynda ornalasqan №3 órt sóndirý bólimshesiniń kishi serjanty, órt sóndirýshi maman – Nursultan Baimuhambetuly. 1998-shy jyly dúnie esigin ashqan Nursultan mamandyǵyna qurmetpen qaraidy, órt salasyndaǵy tájiribesi tolyqtyra túsýdi kózdeidi.
Jyl basynda jas órt sóndirýshi qaladaǵy yqsham aýdanynyń birinde tutanǵan qyzyl jalyndy aýyzdyqtaýǵa atsalysty. Jas ta bolsa, bas bola bilgen Nursultannyń sheber ári jedel áreketiniń nátijesinde tilsiz jaý tez tizgindelip, kópqabatty úidiń turǵyndary jas mamanǵa alǵysyn jaýdyrdy.
"Eń bastysy adamdardyń ómirine qaýip tóngen joq. Órttiń kórshiles úilerge taralýyna jol bermedik", – deidi órt sóndirýshi. Osy oqiǵa kezinde jankeshtilik tanytyp, adam ómirine ara túsken Nursultan "Tótenshe jaǵdai salasynda kórsetken erligi úshin" medalimen marapattaldy.
...
Bul osynaý qaýip-qateri basym salada adal eńbek etetin mamandardyń bir parasy ǵana. Kúndelikti ómirde júzdegen, myńdaǵan adamǵa qol ushyp sozyp, tilsiz jaýmen arpalysýdan taiynbaityn mamandar eń bastysy eńbegin mindetsinbeidi. Olar úshin azamattardyń qaýipsizdigi árdaiym birinshi orynda. Táýekelge basyn tigý kez-kelgenniń qolynan kelmeitin is.
Dalanews.kz anyqtamasy:
Qazan aiynyń 19-shy juldyzy elimizdegi Qutqarýshylardyń kúni. Biylǵy jyly azamattyq qorǵaý salasymen tikelei bailanysty qurylymdardyń qurylǵanyna tabany kúrektei 26 jyl tolady. Osydan 26 jyl buryn Tuńǵysh Prezident Nursultan Nazarbaevtyń buiryǵymen Tótenshe jaǵdai komiteti qurylǵan edi.
