Minekei, búgin Arys qalasynyń 130 baldyrǵany men toǵyz tárbieshisi bar ushaq kieli Ertis-Baian óńirine kelip qondy.
Arystan jetken balalalardy oblys ákiminiń orynbasary Ashat Oralov pen oblystyq Bilim berý basqarmasynyń basshysy Dinislám Bolathan qarsy aldy.
"Qazaqtyń jeri qandai keń bolsa, peiili de sondai darhan. Kelgen qonaqtarymyzdy jaqsylap kútip, pavlodarlyqtardyń qonaqjailyǵyn men óńirdiń ásem tabiǵatyn, onyń ishinde Sabyndykól, Jasybai men Toraiǵyr kólderiniń sulýlyǵyn pash etýimiz kerek.
Bizdiń óńirdiń tereńnen tamyr tartatyn tarihi-mádeni muralary kúlli Qazaqstanǵa tanymal. Arystan jetken balalar Pavlodardyń tabiǵatymen tanys bolsa da, tarihyn jete bilmeýi múmkin. Bul baǵytta da tanymdyq is-sharalar uiymdastyrylatyn bolady.
Oblys basshylyǵy atynan sizderge eki aptaǵa sozylatyn demalystaryńyz mándi de mazmundy, qyzyqty da kóńildi ótýine shyn nietten tilektespiz. Biz, óz tarapymyzdan, sizderge barynsha qolaily jaǵdai jasaýǵa tyrysamyz, – dedi Ashat Oralov.
Arys qalasynan jetken 6-shy, 7-shi synyp oqýshylary tumsa tabiǵatymen tańǵaldyratyn Baianaýyl óńirindegi "Jas dáýren" lagerinde ornalasady.
Oblystyq Bilim berý basqarmasynyń basshysy Dinislám Bolathannyń aitýynsha, arystyq oqýshylardyń demalysy kóńildi de qyzyqty ótýine barlyq jaǵdai jasalǵan.
"Bastysy Arystaǵy apattan júregi shailyǵyp qalǵan jetkinshekterdiń kóńilin aýlap, jazǵy demalystarynyń jaqsy ótýine óz úlesimizdi qosqymyz keledi. Pavlodardaǵy demalys balalardyń esinde kópke deiin qalary anyq", – deidi ol.
Arystyq oqýshylarmen birge Shymkentten kelgen pediatr-maman Snejanna Savichtiń aitýynsha, arystyq balalardyń kópshiligi Pavlodarǵa alǵash kelip otyr. Tipti keibiri ushaqqa da alǵash ret otyryp, ony úlken attraktsion retinde qabyldaǵan eken.
"Arystaǵy apat úlkendi de, kishine de abdyratyp ketti. Pavlodardaǵy demalystary balalardy sergitip, úilerine kóterińki kóńil kúimen oralaryna senimdimin", – deidi ol.
Pavlodarǵa alǵash ret tabany tigen balalardyń biri – Nurlan Beisembek.
"Iá, jarylystardy óz kózimmen kórdim. Janym túrshikti. Alystan kóre sala birden qala syrtyna qashtyq. Áke-sheshemizben birge kólikke otyryp, Shymkentte jetip, ondaǵy meshitte, sodan soń mektepte túnep shyqtyq. Bárimiz aman-esenbiz.
Pavlodar oblysynyń ákimi bizderdi, arystyq balalardy demalysqa shaqyrǵanyn estip erekshe qýandyq.
Ózińe tańsyq ólkeniń tabiǵatymen, tarihymen, turǵyndarymen tanysý biz siiaqty izdenimpaz urpaqqa qyzyqty. Birden áke-sheshemnen Pavlodarǵa jiberýdi ótindim. Ruqsatyn berdi. Demalys jaqsy ótedi dep oilaimyn", – deidi ol.
Arystyq oqýshylarmen birge Pavlodar óńirine tárbieshiler men muǵalimder de kelip jetti. Budan bólek arystyqtar ornalasatyn demalys aimaqtarynda Pavlodar pedagogikalyq ýniversitettiń eriktileri jumys isteitin bolady.
Al oblystyq Bilim basqarmasy, Politsiia departamenti, taýarlar men qyzmetterdiń sapasy jáne qaýipsizdigin baqylaý basqarmasy, tótenshe jaǵdailar jáne densaýlyq saqtaý basqarmasy tarapynan osynaý ortalyqtarǵa ornalasatyn balalardyń ómir súrý qaýipsizdigin qamtamasyz etý boiynsha barlyq sharalar jasalǵan.
Oblystyq bilim berý basqarmasyn habarlaǵandai, Arys balalary úshin 4 lager: Baianaýyl aýdanyndaǵy «Jas dáýren», Sharbaqty aýdanyndaǵy «Chaika», Pavlodar aýdanyndaǵy «Baldáýren» jáne Belovka aýylyndaǵy «Qazhrom» lagerleri jumys isteidi.
Shara aiasynda, Túrkistan óńirinen kelgen balalarǵa Pavlodar oblysynyń mádeni-tarihi oryndaryn, murajailardy, saiabaqtardy kórsetý týrlary josparlanýda.
«Almaty Kitap» baspasynyń ujymy dál osy jolǵa shyǵatyn 130 balany qajetti kiim-keshekpen qamtamasyz etti.
Aita keterligi, evakýatsiialyq ortalyqtarda jatqan balalardy jazǵy demalystarǵa jiberý jumystary jalǵasatyn bolady.
