Almaty qalasyndaǵy Nazarbaev Ziiatkerlik mektebinde oryn alǵan oqiǵaǵa bailanysty mektep ákimshiligi oqýshymen, onyń ata-anasymen jáne ustazdarmen kezdesý ótkizdi. Bul kezdesýge Oqý-aǵartý ministrliginiń ókilderi, bala quqyqtary jónindegi óńirlik ýákil men qoǵamdyq keńes músheleri de qatysty, dep habarlaidy Dalanews.kz.
Kezdesý barysynda mektep tarapynan buryn qabyldanǵan sheshim qaita qaralyp, jan-jaqty talqylandy. Alaida mektep basshylyǵy bul sheshimniń kúshinde qalatynyn málimdedi: oqýshy Nazarbaev Ziiatkerlik mektebinen shyǵarylyp, memlekettik jalpy bilim beretin mektepke aýystyryldy. NZM basqarma tóraǵasy Anýar Janǵozinniń aitýynsha, oqýshynyń ata-anasy bul sheshimge qarsy emes.
“Nazarbaev Ziiatkerlik mektepteri oqýshylarmen árdaiym ózara qurmet pen senimge negizdelgen qarym-qatynas ornatýǵa umtylady. Sonymen qatar muǵalimderge degen qurmet — mekteptiń basty qaǵidalarynyń biri”, – dedi Janǵozin.
Ol qoǵam tarapynan bildirilgen alańdaýshylyqqa alǵys aityp, ashyq keri bailanystyń mańyzyn atap ótti. Sondai-aq jaǵdaiǵa jiti kóńil bólgen Oqý-aǵartý ministrligi men bala quqyqtary jónindegi ýákilderge rizashylyǵyn bildirdi.
Eske salaiyq, Almatydaǵy Nazarbaev Ziiatkerlik mektebinde 11-synyp oqýshysynyń oqýdan shyǵarylýy qoǵamda qyzý pikirtalas týdyrdy. 23 mamyrda mektep ákimshiligi jasóspirimdi tártip erejesin buzdy dep oqýdan shyǵarǵan. Keiinnen oqýshy videoúndeý jasap, kinásin moiyndap, keshirim surady.
Mektep usynǵan málimetke sáikes, qorytyndy baǵalaý kezinde oqýshy telefon qoldanǵan, muǵalim eskertý jasaǵanda, ustazǵa balaǵat sóz aitqan. Osy oqiǵadan keiin másele tártiptik keńeste qaralyp, oqýshyny mektepten shyǵarý týraly sheshim qabyldanǵan.
Jasóspirim jariialaǵan beineúndeýde óz áreketine ókinish bildirip, birneshe ret keshirim suraǵanyn aitady. Ol oqýyn sol mektepte jalǵastyrýǵa múmkindik berýdi surap, qajet bolsa, qoǵamdyq jumysqa tartylýǵa nemese ózge tártiptik sharalarǵa daiyn ekenin málimdegen. Sonymen birge, muǵalimder men ata-analar tarapynan ózine qatysty jalǵan aqparat taralǵanyn jetkizdi.
"Eger maǵan osy mektepte oqýymdy jalǵastyrýǵa múmkindik berilse, tártiptik jazaǵa da, qoǵamdyq jumysqa da daiynmyn", – dedi ol beineúndeýinde.
Oqýshynyń jaǵdaiy ýshyǵyp ketken soń, qoǵam belsendisi Aida Býkaeva onyń densaýlyǵy kúrt nasharlaǵanyn habarlady. Onyń aitýynsha, jasóspirim birneshe kún tamaq ishpei, júike júiesi syr bergen, tipti jedel járdemmen aýrýhanaǵa jetkizilgen.
