Almaty oblysynyń ákimdiginde Niderland Koroldiginiń Aýyl sharýashylyǵy, balyq sharýashylyǵy, azyq-túlik qaýipsizdigi jáne tabiǵatty paidalaný ministrliginiń ókilderimen kezdesý ótti. Keńes Almaty oblysynyń ákimi Marat Sultanǵazievtiń tóraǵalyǵymen ótti, dep habarlaidy Dalanews.kz
Óziniń kirispe sózinde óńir basshysy Qazaqstan men Niderland arasyndaǵy seriktestik qatynastardyń mańyzdylyǵyn atap ótip, aýyl sharýashylyǵy salasyndaǵy ózara is-qimyldyń perspektivalaryn erekshe atap ótti. Ol óńirdiń zamanaýi tehnologiialardy engizýge, investitsiia tartýǵa jáne sheteldik mamandarmen bilim almasýǵa daiyn ekenin jetkizdi.
Qazaqstan tarapynan kezdesýge qatysty:
-
Azat Sultanov — QR Aýyl sharýashylyǵy vitse-ministri,
-
Ulbosyn Sarybaeva — «Kazakh Invest» kompaniiasynyń ókili,
-
Jandáýlet Janbyrbaev — QR Aýyl sharýashylyǵy ministrligi eginshilik departamenti direktorynyń orynbasary,
sondai-aq oblys ákimdiginiń salalyq basqarmalarynyń ókilderi.
Niderland tarapynan:
-
Ian-Keis Hýd — ministrliktiń bas hatshysy,
-
Sara Vissers Ravichandran — aǵa saiasi keńesshi,
ministrlik keńesshileri, sondai-aq Niderlandtyń Qazaqstan men Reseidegi elshiliginiń diplomattary qatysty.
Kezdesý Qazaqstan men Niderland arasynda diplomatiialyq qatynastardyń ornaǵanyna 33 jyl tolýyna orai uiymdastyrylyp, iskerlik yntymaqtastyqtyń tereńdep kele jatqanyn kórsetti.
Marat Sultanǵaziev óńirdiń jetistikterimen tanystyrdy: Almaty oblysy elimizdiń jalpy aýyl sharýashylyǵy óniminiń 8%-yn óndiredi, 100-den astam elmen syrtqy saýda bailanystaryn damytyp keledi, al jalpy óńirlik ónim kólemi boiynsha elimizde onynshy orynnan besinshi orynǵa kóterildi.
Kezdesý barysynda kelesi baǵyttar qamtyldy: turaqty eginshilik, sý resýrstaryn basqarý, innovatsiialar men kásibi oqytý. Birlesken bastamalardy iske qosý, onyń ishinde kásiporyndar men bilim berý baǵdarlamalaryn qurý jospary aityldy.
Jiynda sóz sóilegen Ian-Keis Hýd jyly qabyldaý úshin alǵys bildirip, azyq-túlik qaýipsizdigi, aýyldyq aýmaqtardyń turaqty damýy men agroinnovatsiialardy engizý salalaryndaǵy áriptestikti damytýǵa nietti ekenin jetkizdi.
2024 jyldyń qorytyndysy boiynsha oblys pen Niderland arasyndaǵy ózara saýda kólemi 39 million AQSh dollaryn qurady. Óńirde Niderland kapitalynyń qatysýymen 9 kásiporyn jumys isteidi. Eki tarap ta yntymaqtastyqty tereńdetýge jáne jańa investitsiialyq jobalardy iske asyrýǵa nietti ekenderin rastady.
Sapar aiasynda delegatsiia LST Agro, FRUT ART jáne Ospanova Development aýyl sharýashylyǵy kásiporyndaryna bardy. Munda zamanaýi jumys tásilderi men óndiristik qýattar tanystyryldy.
Bul kezdesý ekijaqty yntymaqtastyqty keńeitý jolyndaǵy mańyzdy qadam boldy. Qol jetkizilgen kelisimder agroónerkásiptik keshendi jańǵyrtýǵa serpin berip, óńirdiń eksporttyq áleýetin nyǵaitýǵa jáne Qazaqstannyń aýyldyq aýmaqtarynyń turaqty damýyna úles qosady dep kútilýde.
