Qazaqstan Ǵalymdar odaǵynyń prezidenti, Memlekettik syilyqtyń laýreaty, akademik Orazaly Sábden eks-prezident Nazarbaev ǵalymdarǵa nege qarsy shyqqanyn aitty. Sondai-aq, ol Zamanbek Nurqadilov kózi tirisinde qandai tulǵa bolǵanyn áńgimeledi, - dep habarlaidy Dalanews.kz.
Orazaly Sábdenniń aitýynsha, Nazarbaev ǵylymmen kúresken joq, ol qazaqtyń ziialylarymen kúresti. Al onyń túp tamyry - ǵalymdar.
"Ǵalymdarǵa, ǵylymǵa QR birinshi prezidentiniń kózqarasy durys bolmady. Esterińizde bolsa, baiaǵyda bir top ǵalym "Bolshe ne býdem molchat" degen maqala jazǵan bolatyn. Qazaqstannyń jańasha damýyna demokratiialyq kózqaras retinde (jazdy - esk.). Ǵalymdar alda ne bolatynyn birinshi kórip otyrady ǵoi. Sodan bastaldy ǵoi dep oilaimyn. Ekinshi jaǵynan Qazaqstannyń astanasy Astanaǵa, Aqmolaǵa kóshti ǵoi. Sol kezde birinshi bul máseleni sheshý úshin prezident Joǵarǵy Keńestiń Prezidiýmyn ákeldi. Parlament qabyldaý kerek qoi. Sonda Joǵarǵy Keńestiń Prezidiým múshesi - 13 adam. Ol kisi (Nazarbaev - esk.) Asanbaevty alyp keldi. "Asanbaev baiandama jasaidy" dedi. Asanbaevty tyńdadyq. Ol ýaqytta bizdiń kózqarasymyz tike bolatyn, qazirgidei Prezident, basqa dep (bólmeitinbiz - esk.). Sonda ashyq áńgime boldy. Birazy qoldady. Biraz kisi qarsy shyqty. Strategiia jaǵynan qaraǵanda durys shyǵar dep oiladyq. "Biraq halyq qinalyp otyrǵanda, kún kóris jaǵdaiy qiyn ýaqytta kerek pe osy másele?" degen másele kóterildi. Mine, sol kezderde prezidenttiń ǵylymǵa degen kózqarasy durys emes ekeni baiqaldy. Sebebi Astanaǵa kóshkende kimmen qoshtasady?! Ziialy qaýymmen, ǵalymdarmen (qoshtasady - esk.), bári Almaty ǵoi. Qazaqstannyń túkpir-túkpiri Almatyǵa qaraityn. Sol faktor áser etti. Bul - úlken saiasi máni bar másele", - deidi ol.
Sondai-aq, ǵalym akademiianyń jabylýy ókinishti jait bolǵanyn aitty.
"Akademik Salyq Zimanovtan bastap talai ret prezidentke hat jazdyq. Keiingi hatymyzda "Zimanov pen Sábdenov qoimaidy. Men barda Ulttyq ǵylym akademiiasy memlekettiki bolmaidy" degen sózdi estip qaldyq. Shynynda da, solai boldy ǵoi. Ol barda bolmady. Keiin Qasym-Jomart Toqaev kelgennen keiin Ulttyq ǵylym akademiiasyn qaitadan memlekettiki jasady", - dedi ol "Demokratiialy Qazaqstanǵa" bergen suhbatynda.
Orazaly Sábden Nazarbaev júiesine qarsy shyqqan Nurqadilovke qatysty da pikir bildirdi.
"Ritts Palasta as berdi. Bir ýaqytta Bolat Ábilov mikrofondy alyp, "sóileńiz" dedi. Sonda "Zamanbekti oimen ala almaǵandar, oqpen aldy" dedim. Máseleniń túp tamyry qaida jatyr?! Sebebi Zamanbekti jaqsy bilemin, ol istiń adamy, aitty ma, istetedi. Bizge sol jetpei jatyr. Ashyǵyn aitý kerek, istiń adamy jetpei jatyr. Qazaqtyń patrioty. Qairatker. Men bolsam, Zamanbektiń potentsialyn paidalanatyn edim. Oǵan qarsy shyqpai paidalanamyn. Múmkindigi bar adam ǵoi. Sony paidalaný kerek. Qazaqtyń kóre almaýshylyq degen máselesi osy kúnge deiin qalmai keledi. Qaidan shyqqan nárse?! Ár halyqta da bar shyǵar. Nurqadilov, shynymen de, myqty boldy.
...Qasyndaǵy otqa mai salýshylar tolyp jatyr ǵoi. Zamanbektiń tuiaǵyna jaramaityndar júr. Olar otqa mai salmai ma?! Sonyń bári ýshyǵady. Zamanbektiń harakterin jaqsy bilemin. Ol oq bolsa oq, shoq bolsa shoq deidi. Sodan bári shyǵyp ketti. ...Árine, júie, bilik (óltirdi - esk.). Bul - júieniń tikelei printsipi. Kim bilipti alda ne bolatynyn?! Bir chemodan kompromat shyǵyp ketse, ne bolyp ketetinin Qudai biledi", - dedi Sábden "Demokratiialy Qazaqstanǵa".
