Al, kúni keshegi Almatyda ótken, Toqaevtyń haty oqylǵan astan keiin «Zamanbektiń isi qaita kóterilýi múmkin» degen sybys tarady.
Saiasatker Bolat Ábilovtiń «Giperborei» arnasyna bergen suqbatynda (№390) osy ahýal jaiynda bylai deidi:
«Menińshe, Toqaev osy iske qatysty tapsyrma beredi. Men Zamanbektiń uly Qairatpen tyǵyz bailanystamyn, jaqsy aralasamyn. Onyń bul sharýany qaitadan qolǵa alǵanyna qoldaý bildirdim. Eger bizdiń tarapymyzdan qandai da bir kómek kerek bolsa, árkez daiyn ekenimizdi aittym. Eki jyl buryn onyń betin qaitaryp tastady. Bul ýaqytsha ǵana. Onyń óz-ózin óltirdi degen nusqa burynǵy bilikke qajet boldy.
Sýitsid degenge sol kezde eshkim senbese de, resmi málimdemede solai aityldy. Zamanbek Qalabaiulymen kózi tirisinde de oqiǵa bolǵan bólmede talai suqbattasqanbyz. Áli kóz aldymda, biliard ústeli bar ol bólmede. Tipti ol «Terminator» bolsa da, ózin eki jerden atyp, keiin basyna oq atý esh múmkin emes.
Ol bólmede Zamanbektiń otyratyn kreslosy boldy. Ol ózine kelgen qonaqtardy sol orynda otyryp qabyldaityn».
Spiker Zamanbektiń óz-ózine qol salǵany týraly tergeý nusqasy esh aqylǵa syimaitynyn da atap ótedi.
«Munyń túptiń-túbinde qaita qozǵalatynyna biz sendik. Oǵan tek ýaqyt qajet. Mine, sol ýaqyt jetken siiaqty», - degen oppozitsiialyq «Aqjol» partiiasynyń burynǵy teń tóraǵasy, belgili kásipker.
Ol belgili saiasatker Altynbek Sársenbaevtyń kisi qolynan qaza tabýy áli kúnge deiin shynaiy tergeldi deýge kelmeitinin de aitady. 2006 jyldyń 11 aqpanynda Sársenbaev kisi qolynan qaza tapty. Zamanbek Nurqadilov qazasynyń aq-qarasyn anyqtatpai qoimaimyn dep bekingen saiasatkerdiń ne úshin óltirilgeni anyq.
«Árine, tergeý tolyq júrgizilgen joq. Onyń qorytyndysy aldyn ala daiyndalyp qoidy. Kisi óltirgenderdiń bireýin ǵana tapty, Bagimov degen bireýdi. Tapsyrys berýshini de anyqtady - Erjan Ótembaev degen. Ony men de tanityn edim. Ol ózimen-ózi júrgen, eshkimnen alty alasy, bes beresi joq, araqqa salynǵan adam.
Onyń Altynbekti «sabasyna túsirgim keldi» degen jaýabynyń ózi kúlkili. Muny arnaiy qyzmet joǵarydan kelgen tapsyrma boiynsha uiymdastyrǵany sózsiz. Shyn tapsyrys berýshiniń aty atalmaǵany, is ádil júrgizilmegeni alty jasar balaǵa da túsinikti», - dedi Bolat Ábilov.
Áńgime barysynda spiker sotta sóz bolǵan derekterdi de eske saldy.
«Mundai aqparat qaidan sotqa jetkenin bilmeimin, biz de tań qaldyq. Tapsyrysty oryndaǵan Ibragimov (qylmys álemine ketken burynǵy politsiia qyzmetkeri) oqiǵa bolatyn 11 aqpannan biraz kún buryn Ulttyq qaýipsizdik komitetiniń podpolkovnigi Bolatpen uialy telefon arqyly kúnine 15-18 ret sóilesip otyrǵan.
UQK podpolkovnigi! Biri killer, ekinshisi ulttyq qaýipsizdik, ekeýine ortaq qandai áńgime bolýy múmkin? Iaǵni, podpolkovnik killermen bailanysta otyrǵan, oǵan oqiǵa bolatyn kúni A.Sársenbaevtyń búkil marshrýtyn aityp, habarlaǵan: «Altynbek ofisten shyqty, Medeýge 5 shaqyrym jetpei (sol mańda Altynbek shaǵyn úi jaldap turatyn) «kútip» alasyń dep. Menińshe, bul bir ǵana adamǵa kerek boldy. Komandany bergen sol kisi. Sebebi odan basqa bul is eshkimge kerek emes.
Bireýler muny istegen Rahat (Áliev), taǵy basqa nusqalardy aitady. Meniń oiymsha, bul Rahattyń deńgeii emes.
Iá, Rahat ońbaǵan adam, túrli qiturqylyqtarǵa bardy. Nurbank menedjerleriniń kózin qurtty, t.b. Biraq, qaitalap aitamyn, Altynbek pen Zamanbekti óltirýge onyń táýekeli jetpeidi. Eki azamat ta onyń oinaityn adamdary emes. Nurqadilov isi qaita tergeletin bolsa, onda Altynbek Sársenbaevtyń isi de qaita kóteriledi dep oilaimyn», - deidi BolatÁbilov.
