Oblys ákimi Nurlybek Nálibaev Qyzylorda qalasyndaǵy Shyǵarmashylyq-innovatsiialyq ortalyqtyń qurylysymen tanysty,- dep habarlaidy Dalanews.kz.
Ortalyqty «Bi Global» seriktestigi salyp jatyr. Jalpy aýdany 3820,43 sharshy metrlik ǵimarattyń bas jobalaýshysy «TEHNIKALIQ BAQILAU», tehnikalyq qadaǵalaýshysy «Alataý Sapa Qurylys» seriktestikteri.
Ortalyqta balalarǵa sporttyq saýyqtyrý, kórkem - estetikalyq, ǵylymi-tehnikalyq, tarihi-ólketaný baǵyttarynda qyzmet kórsetiledi. Budan bólek, voleibol, basketbol, fýtbol, vorkaýt alańdary, sońǵy úlgidegi bassein qarastyrylǵan. Sondai-aq, munda oqýshylardyń bilimin jetildirip, ǵylymi jumystarmen ainalysýyna múmkindik bolady. Qalanyń kólik qozǵalysy qarqyndy kósheleriniń birindegi qurylys alańynda sáýletti ǵimarat boi kóteretin kún jaqyn. Ortalyqty mejeli merzimde tabystaý úshin jumys júrgizilip jatyr.
Aita keteiik, óńirde qurylys jumystary respýblikalyq orta kórsetkishten 41 paiyzǵa joǵary. Aimaqta jańa áleýmettik nysandar boi kóterýde. Ótken jyly 69 jańa ǵimarat salyndy, onyń 25-i bilim, 16-sy densaýlyq saqtaý, 11-i mádeniet, 17-si sport salasyna tiesili.
«Jaily mektep» ulttyq jobasymen 21 mektep salý josparlanǵan. Búginde 5 bilim ordasy paidalanýǵa berildi, 5 mektep jańa oqý jylyna deiin tabystalady. «Aýylda densaýlyq saqtaýdy jańǵyrtý» ulttyq jobasy aiasynda 28 nysan salyndy.
Oblystyń barlyq aýylyndaǵy densaýlyq saqtaý mekemelerine 245 jańa sanitarlyq kólik alynyp, jedel járdem máselesi tolyq sheshildi. Memleket basshysynyń bastamasymen qurylǵan «Qazaqstan halqyna» qory óńirdiń densaýlyq saqtaý salasyn damytýǵa 4,8 mlrd. teńge qarjy bóldi. Aral, Jańaqorǵan aýdandary men Qyzylorda qalasynda «Qamqorlyq» ońaltý ortalyqtary ashyldy.
Munan bólek, 1 mlrd. 100 mln. teńgege skrining júrgizýge arnalǵan jyljymaly meditsinalyq keshender alynyp, búginde aýyl turǵyndaryna úzdiksiz meditsinalyq qyzmet kórsetýde. Jergilikti kásipkerlerdiń demeýshiligimen 50 mlrd. teńgege jýyq qarjyǵa oblys ortalyǵy men aýdandarda jańa ǵimarattar, parkter, oiyn alańdary salynyp, memleket teńgerimine ótti.
