Nurasyl taǵy da tuǵyr biiginde
Nurasyl óziniń alǵashqy kezdesýinde ýkraindyq qarsylasynan basym tússe, jartylai finalda túrkiialyq sportshyny san soqtyrǵan. Al, aqtyq synda tatami iesinen ailasyn asyryp, kezekti márte jeńimpaz bolyp otyr. Osylaisha, bairaqty básekede el namysyn abyroimen qorǵap, kók týymyzdy kókte jelbiretip, ánuranymyzdy asqaqtatyp qaitty. Nurasyl Qýandyqty alǵashqy ustazy Marat Tileýqulov bastaǵan shýlyq sportshylar úlken qurmetpen kútip aldy. Alǵashqy ustazy dep ekpin túsirýimizdiń de ózindik sebebi bar. Óitkeni, Shý aýdandyq taekvondo federatsiiasynyń prezidenti, belgili jattyqtyrýshy Marat Tileýqulov Nurasyldy 8 jasynan bastap sportqa baýlyp, 5 jyl boiy shákirtine taekvondonyń qyr-syryn úiretken. Ol byltyrǵy oqý jylynan bastap oblys ortalyǵyndaǵy sportqa daryndy balalarǵa arnalǵan mamandandyrylǵan oblystyq mektep-internatynda tárbielenýde.
Sonymen qatar, Nurasyl Qýandyq ústimizdegi jyldyń naýryz aiynda taekvondodan Óskemen qalasynda ótken kadetter arasyndaǵy Qazaqstan birinshiliginde jeńimpaz atanǵan bolatyn. 65 keli salmaqta óner kórsetetin Nurasyl atalǵan jarysta bes birdei qarsylasyn jeńip, el chempiony atanǵan. Sol jetistiginiń arqasynda aǵymdaǵy jyldyń shilde aiynda Iordaniia elinde ótetin Aziia chempionatynyń jáne tamyz aiynda Ózbekstan astanasy Tashkentte ótetin álem birinshiliginiń joldamasyna qol jetkizdi. Sondai-aq, shýlyq sportshy buǵan deiin de birqatar jetistikterge qol jetkizgen. Máselen, qańtar aiynda ǵana Birikken Arab Ámirliginde ótken halyqaralyq «Fujairah open» jarysynda da altynnan alqa taǵyp, abyroimen oralǵan edi. Oǵan qosa, 10-11 jastaǵy sportshylardyń arasynda eki márte Qazaqstan chempiony atanǵan. Osyndai jetistikteriniń arqasynda biyl ulttyq qurama sapyna alynyp, oblys namysyn bairaqty básekelerde qorǵap júr. Búgingi tańda talantty taekvondoshy elimizdiń ulttyq quramasymen birge Almaty qalasynda oqý-jattyǵý jiyndaryn ótkizýge attanbaq. Aita ketýimiz kerek, aýdan ortalyǵy Tóle bi aýylyndaǵy Sádý Shákirov atyndaǵy mektep daryndy taekvondoshylardyń sheberhanasy ispetti. Nege deseńiz, dál osy mektepte oqyǵan Merýert Áshirbekova taekvondodan úsh márte Qazaqstan chempiony atanǵan. Keshe ǵana jeńimpaz atanyp kelgen Nurasyl Qýandyq ta osy mekteptiń túlep ushqan. Elimizdiń birtýar azamaty Qairat Rysqulbekov ta atalmysh mektepten bilim alǵan. Tipti, aýdanda uzaq jyldar boiy úzdiksiz uiymdastyrylyp kele jatqan taekvondodan Q.Rysqulbekov atyndaǵy dástúrli týrnir bar. Belgili jattyqtyrýshy Marat Tileýqulovtyń bastamasymen bul týrnir biyl 20-shy márte uiymdastyrylmaq.
Shý aýdany
