Jetisaı aýdanyna jumys saparymen barǵan Túrkistan oblysynyń ákimi Nuralhan Kósherov birqatar nysannyń jumysymen tanysyp, sharýalarmen kezdesti, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.
Eń aldymen «Jaıly mektep» ulttyq jobasy aıasynda salynyp jatqan bilim berý nysanynyń qurylys jumystarymen tanysyp, jaýapty merdigerlermen qurylysqa qatysty týyndaǵan máselelerdi talqylady. Bul rette jumys sapasynyń aqsamaýyn eskertip, mekteptiń qurylysyn 2025 jyldyń mamyr aıynda aıaqtaýdy tapsyrdy.
Zamanaýı bilim ordasynyń qurylysyn «Bazis Construction» JSHS júrgizip jatyr. Qurylysy 2023 jyldyń tamyz aıynda bastalǵan. Qazirgi tańda qurylys jumystary 53% oryndalǵan. Qurylys alańynda 74 adam jumys isteıdi. Jalpy alańy 2250 sharshy metr jerde ornalasqan nysan ınjenerlik ınfraqurylymmen tolyq qamtamasyz etilgen. Joba quny 8,5 mlrd. teńgeni quraıtyn bilim uıasyna tıesili jer teliminiń alańy – 4 gektar.
Odan soń, óńir basshysy «Kamıljon» sharýa qojalyǵynyń erte egiletin qyryqqabat daqylynyń egis alqabymen tanysyp, jergilikti sharýalarmen kezdesti. Kezdesýde salaǵa qatysty ózekti máseleler kóterilip, suraqtarǵa jaýap aldy.
1996 jyly qurylǵan bul sharýashylyqtyń egis kólemi 80 gektardy quraıdy. Ótken jyly jyly egistik alqabyna 8 ga qyryqqabat daqylyn tamshylatyp sýǵarý ádisimen, 72 ga maqta daqylyn dástúrli ádispen ekken. Qyryqqabattan 35 tonna ónim alyp, ónimdi Resseı memleketine eksporttady. Al maqtadan 30 sentner ónim aldy. Atalǵan sharýa qojalyǵy 2025 jyly egistik alqabyna 15 gektarǵa qyryqqabat daqylyn tamshylatyp sýǵarý ádisimen egip, 6 gektarǵa qarbyz daqylyn tamshylatyp sýǵarý ádisimenen, 59 gektarǵa maqta daqylyn dástúrli ádispen egýdi josparlap otyr. Munda 10 adam turaqty jumyspen qamtylǵan.
İssapar sońynda Nuralhan Kósherov «Táýelsizdiktiń 20 jyldyǵy» kanalynyń №1 sý sorǵy nasostyq stansıasynda bolyp, sý arnasynyń jaǵdaıymen tanysty. Irrıgasıalyq júıeniń qýattylyǵy sekýndyna 60 tekshe metr sýdy quraıdy. Bul aýqymy 86,7 myń gektar bolatyn jer sharýashylyǵyn sýarýǵa jetkilikti. Vegetasıalyq kezeńde, jalpy 12 nasostyń 3-eýin ǵana qosýǵa múmkindik bolyp, nebári 10-12 m3/s aǵyn sý beriledi. Aǵyn sýmen qamtamasyz etýge qıyndyq týyndaıdy.
Kanal 2011 jyly salynǵan. Atalǵan kanaldyń jalpy uzyndyǵy 28,9 shaqyrymdy quraıdy. Onyń 4,8 shaqyrymy betondalǵan, 13 shaqyrymy sý jetkizýshi kanal, betondaýdy qajet etetin bóligi – 10,1 shaqyrym. Búginde atalǵan aımaqtyń sý ótkizý qabileti tómendegen. Jyl saıyn «Qazsýshar» RMK tarapynan arnaıy tehnıkamen qulaǵan jaqtaýlarǵa topyraq tósep, nyǵyzdaý jumystaryn júrgizýde. Alaıda bul jumystar kanaldy tek ýaqytsha ustap turýǵa jaramdy. Kanal 86,7 myń gektar egistik alqapty aǵyn sýmen qamtamasyz etýge qaýqarly.
Jumys sapary barysynda óńir basshysy qurylys salasyndaǵy máselelerdi sheshý, aýyl sharýashylyǵyn damytý jáne ınfraqurylymdy jaqsartý maqsatynda naqty tapsyrmalar berdi.
