Shymkentte qaza tapqan Nurai Serikbaidyń ólimine qatysty qylmystyq is boiynsha sot protsesiniń bastalý kúni belgili boldy, dep habarlaidy dalanews.kz.
Aldyn ala sot otyrysy 21 shilde kúni saǵat 10:00-de Shymkent qalasynyń mamandandyrylǵan aýdanaralyq qylmystyq ister jónindegi sotynda ótedi.
Marqumnyń otbasynyń múddesin advokattar Aianhan Omarov pen Muhammedjan Ahmetov qorǵaidy.
Advokat Aianhan Omarovtyń aitýynsha, bul – atalǵan is boiynsha alǵashqy sot otyrysy.
«Aldyn ala tyńdaýda sot isti máni boiynsha qaraýǵa taǵaiyndaý máselesin sheshedi, dáleldemelerdi zertteý tártibin aiqyndaidy. Sondai-aq istiń alqabilerdiń qatysýymen qaralatyny nemese qaralmaityny týraly másele de osy otyrysta qaralady», – dedi advokat.
Osyǵan deiin Nurai Serikbaidyń týystary prokýratýradan qylmystyq isti qosymsha tergeýge qaitarýdy suraǵan bolatyn. Olardyń aitýynsha, is materialdarymen tanysý barysynda birqatar kemshilik anyqtalǵan. Sondai-aq jaqyndary men advokattary sotqa joldanar aldynda taǵylǵan aiyptardyń bir bóligi alynyp tastalýy múmkin degen alańdaýshylyq bildirgen.
Is boiynsha kúdikti 28 jastaǵy er adamǵa asa qatygezdikpen adam óltirý, stalking jáne nekege turýǵa májbúrleý baptary boiynsha aiyp taǵylǵan.
Eske salaiyq, Nurai Serikbai biyl qańtar aiynda qaza tapqan. Tergeý málimetinshe, kúdikti qyzdy dúkenniń mańynda kútip turǵan, ony kúshpen ustap qalyp, keiin birneshe ret pyshaq jaraqatyn salǵan.
