Shymkent qalasynyń mamandandyrylǵan aýdanaralyq sotynda qaza tapqan Nurai Serikbaidyń ólimine qatysty is boiynsha sot otyrysy jalǵasýda, dep habarlaidy dalanews.kz.
Kezekti sot otyrysynda sýdia Sammidin Temirlaev Nurai Serikbai men onyń anasy Aigúl Saǵynbekova arasyndaǵy hat almasýdy oqyp berdi. Sýdianyń aitýynsha, bul habarlamalar marqumnyń týystary bergen burynǵy aiǵaqtardy rastaidy.
Sotta belgili bolǵandai, Nuraidyń anasy qyzyna birneshe ret habarlasqanymen, bailanysa almaǵan. Keiin qyzyna qaita qońyraý shalýdy surap habarlama joldaǵan. Al 4 qazanda, iaǵni qyzdyń urlanǵan kúni de týystary onyń telefonyna shyǵa almaǵan.
Sýdia oqyǵan hattardyń birinde anasy qyzyna:
«Nurai, maǵan habarlasshy. Ne istep júrsiń?» dep jazǵan. Buǵan jaýap retinde Nurai: «Anashym, bári meniń kelisimimsiz boldy. Muny qalamadym», – dep jaýap bergen.
Sýdianyń sózinshe, jariialanǵan jazbalar Nuraidyń ata-anasy men jaqyndarynyń buǵan deiin bergen jaýaptarymen tolyq sáikes keledi.
Eske salaiyq, biyl qańtar aiynda Shymkentte 21 jastaǵy stýdent Nurai Serikbai qatygezdikpen óltirilgen bolatyn. Tergeý málimetinshe, kúdikti Sherhan Aimahan buǵan deiin qyzdyń sońynan qalmai, tipti alyp qashqan.
Prokýror sotta jariialaǵan aiyptaý aktisine sáikes, Nurai kezdesýden bas tartqannan keiin kúdikti onyń úiiniń mańyna kelip, aldymen bes ret pyshaq jaraqatyn salǵan. Keiin qaita oralyp, qyzǵa taǵy birneshe márte pyshaq suqqan.
Qazirgi ýaqytta is boiynsha sot talqylaýy jalǵasyp jatyr.
