Saltanatty is-sharaǵa QR Memleket syilyǵynyń iegeri, Jazýshylar Odaǵy basqarmasynyń hatshysy, aqyn Nesipbek Aituly, Parlament Májilisiniń depýtattary, mádeniet qairatkerleri jáne óner juldyzdary qatysty.
– Búgingi músháira Elbasy jariialaǵan Jastar jyly men «Rýhani jańǵyrý» baǵdarlamasy aiasynda ótip otyr. Elimizdiń ár óńirinen túrli týyndylar kelip tústi. Ádilqazylar alqasy mundai synda úzdik shyqqan daryndardy tańdap otyr. Jastardyń aldyna erkin taqyryp qoiyldy. Ár aqyn óziniń oiynda, júreginde júrgen shyǵarmalaryn usyndy. Mundai is-sharanyń basty maqsaty – jastardy qoldaý, olardyń boiyndaǵy elge, Otanǵa degen patriottyq sezimin, súiispenshiligin arttyrý. Osy joba qolǵa alynǵan úsh jyldyń ishinde myńnan asa jas aqyn óz týyndylaryn shyǵaryp otyr, – dedi Nur-Sultan qalasynyń Qoǵamdyq damý isteri basqarmasynyń basshysy Talǵat Rahmanberdi.
Nur-Sultan qalasynyń Qoǵamdyq damý isteri basqarmasynyń basshysy atalǵan baiqaý kelesi jyly tek respýblikalyq deńgeide emes, halyqaralyq deńgeide ótetinin alǵa tartty. Atap aitqanda, baiqaýǵa túrki memleketteriniń jas aqyndary qatysatyn bolady.
Sonymen «Biz jastarǵa senemiz» báigesiniń qorytyndysy boiynsha Almaty óńiriniń jas daryny Nurbol Muratbek I oryndy ielense, II oryn Ernar Maqsutov pen Sániia Júrsinovaǵa buiyrdy. Uiymdastyrýshylar olarǵa aqshalai sertifikat tabys etti. Úzdik úshtikti Amangeldi Aqjigit, Dýlatbek Kenjebek jáne Nurdáýlet Ómirbek túiindedi.
– Músháiraǵa respýblikamyzdyń óńirlerinen 140-qa tarta aqyn qatysty. Onyń ishinde 10 aqynǵa júlde berildi, al bas-aiaǵy 30 aqyn úzdik atanyp, jeke kitabyn shyǵardyq. Taqyryp retinde Maǵjan Jumabaiulynyń «Men jastarǵa senemin» sózin alyp, búginginiń turǵysynan «Biz jastarǵa senemiz» degen at qoiyp, aidar taqtyq. «Rýhani jańǵyrý» baǵdarlamasy aiasynda ótip jatqan bul jarystyń máni óte zor. Biz jańa jas talanttardy ashýmen qatar elimizdiń búgingi tańdaǵy júrgizip otyrǵan saiasatyn, halqymyzdyń bolashaǵyn jyrlaýdy jastardyń aldyna taqyryp etip qoidyq. Olardyń týyndylarynan jańa bir lep, jańa zaman tynysy, bolashaqqa degen senim baiqaldy. Júlde alǵan jastardyń bári 16-29 jas aralyǵynda, – dep aqyndar jarysyna qazylyq jasaǵan Nesipbek Aituly óz oiyn ortaǵa saldy.
