Án avtorlary – QR Eńbek sińirgen qaıratkeri Marjan Arapbaeva (mýzykasy) men aıtysker aqyn Syrym Áýezhan (sózi).
Aqyn sózi Táýelsiz eldiń tarıhyn toqyraý jyldarynan osy kezge deıin jigerimen jetektep jetkizgen Elbasynyń eńbegine alǵys aıtyp, myzǵymas birligimizdiń beriktigi jetistikterge jetelerin aıta otyryp, tyńdaýshyny jaqsylyqty kóre bilýge, ótkenge kóz júgirte otyryp, bolashaqqa senimmen qaraýǵa shaqyrady.
Maǵynaly teksti yrǵaǵy belsendi, dıapazony keń, kóńildi sharyqtatar áserli mýzyka tolyqtyryp tur.
Ánniń beınebaıanynda Azattyqtyń alǵashqy 30 jylynda óndiriste, bilim men ǵylymda, sport pen medısınada, áskerı salada jetken jetistikterdi, shegendelgen shekaramyz ben táýelsiz Qazaq eliniń týy tigilgen Almaty men elordasy Nur-Sultannyń, Túrki áleminiń rýhanı astanasy – Túrkistannyń damý joly kórsetildi.
Beınebaıannyń túsirilimine kópultty memlekettegi tatýlyqtyń uıytqysy bolǵan Qazaqstan halqy Assambleıasynyń ókilderi, álemdik bilimge jol ashqan «Bolashaq» halyqaralyq stıpendıasynyń túlekteri, «Biz Birgemiz!» aksıasy sheńberinde jumys atqarǵan volonterlar qatysty.
Beınebaıanda kórsetilip jatqan oqıǵalar Tuńǵysh Prezıdent – Elbasynyń tarıhı sátterde sóılegen sózderimen baılanystyrylǵan.
Ándi elimizge tanymal ánshiler M.Arapbaeva, J.Aýypbaev, Z.Omarova, E.Aıdar, S.Ibragımov, S.Dáýlethanovalar men «Aınalaıyn» balalar hory oryndady.
Avtorlar erlik pen eldiktiń ónegesin nasıhattap, birlikke shaqyryp, rýhty kóteretin bul týyndy aldaǵy ýaqytta halyq arasynda keń taralyp, Táýelsizdiktiń 30 jyldyǵynyń beıresmı ánuranyna aınalatynyna senimdi.
https://www.youtube.com/watch?v=ftmZV4mdk6U&t=1s
