ءان اۆتورلارى – ق ر ەڭبەك سىڭىرگەن قايراتكەرى مارجان اراپبايەۆا (مۋزىكاسى) مەن ايتىسكەر اقىن سىرىم اۋەزحان (ءسوزى).
اقىن ءسوزى تاۋەلسىز ەلدىڭ تاريحىن توقىراۋ جىلدارىنان وسى كەزگە دەيىن جىگەرىمەن جەتەكتەپ جەتكىزگەن ەلباسىنىڭ ەڭبەگىنە العىس ايتىپ، مىزعىماس بىرلىگىمىزدىڭ بەرىكتىگى جەتىستىكتەرگە جەتەلەرىن ايتا وتىرىپ، تىڭداۋشىنى جاقسىلىقتى كورە بىلۋگە، وتكەنگە كوز جۇگىرتە وتىرىپ، بولاشاققا سەنىممەن قاراۋعا شاقىرادى.
ماعىنالى تەكستى ىرعاعى بەلسەندى، دياپازونى كەڭ، كوڭىلدى شارىقتاتار اسەرلى مۋزىكا تولىقتىرىپ تۇر.
ءاننىڭ بەينەبايانىندا ازاتتىقتىڭ العاشقى 30 جىلىندا وندىرىستە، ءبىلىم مەن عىلىمدا، سپورت پەن مەديسينادا، اسكەري سالادا جەتكەن جەتىستىكتەردى، شەگەندەلگەن شەكارامىز بەن تاۋەلسىز قازاق ەلىنىڭ تۋى تىگىلگەن الماتى مەن ەلورداسى نۇر-سۇلتاننىڭ، تۇركى الەمىنىڭ رۋحاني استاناسى – تۇركىستاننىڭ دامۋ جولى كورسەتىلدى.
بەينەباياننىڭ تۇسىرىلىمىنە كوپۇلتتى مەملەكەتتەگى تاتۋلىقتىڭ ۇيىتقىسى بولعان قازاقستان حالقى اسسامبلەياسىنىڭ وكىلدەرى، الەمدىك بىلىمگە جول اشقان «بولاشاق» حالىقارالىق ستيپەندياسىنىڭ تۇلەكتەرى، «ءبىز بىرگەمىز!» اكسياسى شەڭبەرىندە جۇمىس اتقارعان ۆولونتەرلار قاتىستى.
بەينەباياندا كورسەتىلىپ جاتقان وقيعالار تۇڭعىش پرەزيدەنت – ەلباسىنىڭ تاريحي ساتتەردە سويلەگەن سوزدەرىمەن بايلانىستىرىلعان.
ءاندى ەلىمىزگە تانىمال انشىلەر م.اراپبايەۆا، ج.اۋىپبايەۆ، ز.وماروۆا، ە.ايدار، س.يبراگيموۆ، س.داۋلەتحانوۆالار مەن «اينالايىن» بالالار حورى ورىندادى.
اۆتورلار ەرلىك پەن ەلدىكتىڭ ونەگەسىن ناسيحاتتاپ، بىرلىككە شاقىرىپ، رۋحتى كوتەرەتىن بۇل تۋىندى الداعى ۋاقىتتا حالىق اراسىندا كەڭ تارالىپ، تاۋەلسىزدىكتىڭ 30 جىلدىعىنىڭ بەيرەسمي ءانۇرانىنا اينالاتىنىنا سەنىمدى.
https://www.youtube.com/watch؟v=ftmZV4mdk6U&t=1s
