«Nur Otan» partiiasy aýyl ákimderiniń sailaýyna 587 úmitkerin qosapaqshy
Onyń aitýynsha, keshe barlyq aimaqta «Nur Otan»-nan 587 kandidat tirkelgen. Úmitkerlerdiń 35%-ten astamy – jańa tulǵalar, onyń ishinde bilim berý salasynyń ókilderi, kásipkerler, fermerler bar. Olardyń kópshiligi – taiaýda ótken partiiaishilik praimerizdiń qatysýshylary, bastaýysh partiia uiymdarynyń tóraǵalary. Kandidattardyń ortasha jasy – 46 jas. Áielder – 11%, 35 jasqa deiingi jastar – 14%.
– Ózderińizge málim, el Prezidenti Qasym-Jomart Kemeluly Toqaevtyń bastamasy boiynsha 25 shildede tuńǵysh ret aýdandyq mańyzy bar qalalardyń, aýyldar men kentterdiń jáne aýyldyq okrýgterdiń ákimderin tikelei sailaý ótedi. Memleket basshysy atap ótkendei, «aldaǵy sailaý – saiasi júiemizdiń kemeline kelgeniniń belgisi ǵana emes, sonymen birge qoǵamymyzdyń demokratiialyq damý jolyna nyq qadam basqanyn bildiredi». «Nur Otan»-nyń mindeti – tek sailaýda jeńiske jetý ǵana emes, aýyldardyń damýyna júieli jaǵdai jasaý, azamattardyń naqty máselelerin sheshý. Partiia óz kandidattaryn usyna otyryp, birinshi býyn ákimderdiń el Prezidenti usynǵan «Halyq únine qulaq asatyn memleket» tujyrymdamasy aiasynda halyqpen ózara árekettestiginiń jańa mádenietin qalyptastyra otyryp, zamanaýi tásilderdi endirýde, – dedi Baýyrjan Baibek.
Partiia Tóraǵasynyń birinshi orynbasary keltirgen málimetterge súiensek, bul úshin partiia óz kandidattaryn jańa jaǵdaida, adamdarmen tikelei «qoian-qoltyq» jumys isteýge baǵyttap, tiimdi keri bailanys ornatýǵa oqytýda. Jergilikti jerlerdegi barlyq kandidat pen shtab músheleri Saiasi menedjment mektebiniń bazasynda seminardan ótip, qajetti uiymdyq, ádistemelik jáne basqa da qoldaýmen qamtamasyz etilgen. Olardyń árqaisysynda aýmaqtyń múmkindigin eskere otyryp, partiia qoldaýymen qamtamasyz etilgen naqty sailaýaldy baǵdarlamasy tujyrymdalǵan.
– «Nur Otan» maqsaty aiqyn, naqty ister partiiasy retinde kúndelikti jumysynda saiasi jańashyldyq, júielilik jáne sabaqtastyq sekildi qaǵidattardy basshylyqqa alady. Elbasy, partiia Lideri Nursultan Nazarbaev «Nur Otan» qyzmetiniń negizi etip alǵan naq osy tásilder partiiamyzdyń sailaýlarda jeńiske jetýin, onyń uzaq merzimdi saiasi kóshbasshylyǵyn qamtamasyz etip keledi. Osylaisha, «Nur Otan» bul sailaýǵa barynsha daiyndyqpen kelip otyr. Qoǵamdyq saiasat institýtynyń áleýmettik zertteýine, partiianyń qoǵamdyq qabyldaý bólmeleriniń derekterin taldaýǵa jáne jergilikti jerlerdegi qoǵamdyq-saiasi ahýal monitoringine sáikes biz sailaý okrýgteriniń 80%-ten astamynda jeńiske qol jetkizýdi maqsat etip otyrmyz, – dep atap ótti ol.
Sondai-aq, Baýyrjan Baibek óz jazbasynda «Nur Otan» parlamenttik sailaýlardan keiin birden sailaýaldy ýádelerin iske asyrýǵa belsendi túrde kiriskenine erekshe toqtaldy.
Sailaýdan keiingi mindetterge orai búkil qajetti partiialyq infraqurylym jańasha qaita qurylymdanǵany aityldy. Jaýapty depýtattar men basshylar bekitilgen 217 jol kartasy iske asyrylýda. Sailaýaldy ýádelerdi monitoringteý jáne jergilikti jerlerde ózekti máselelerdi ashyp aitý úshin 12 myńnan astam belsendi azamattyń qatysýymen 1,7 myńnan astam qoǵamdyq keńestiń óńirlik jelisi quryldy.
«Ózgerister joly: Ár azamatqa laiyqty ómir!» Sailaýaldy baǵdarlamasy qazirgi kezde respýblikalyq deńgeide 7%-ke, óńirlik deńgeide 5%-ke oryndaldy. Qoǵamdyq keńester memlekettik organdar úshin 250-den astam naqty usynymdar tujyrymdady, onyń ishinde bizneske kedergilerdi joiý, memlekettik satyp alý júiesin jetildirý, áleýmettik áleýmettik mańyzdy azyq-túlik taýarlarynyń baǵasyn ustap turý boiynsha sharalar qabyldaý jáne basqalary bar. Óńirlik deńgeide 3,3 myńnan astam ózekti áleýmettik másele qaraldy. Kóterilip otyrǵan máselelerdiń barlyǵy partiialyq baqylaýǵa alynady.
Tek jyl basynan beri partiianyń qoǵamdyq qabyldaý bólmelerinde depýtattar, «Nur Otan» partiiasynyń músheleri – memlekettik organdardyń basshylary 14 myńnan astam qabyldaý ótkizip, 74 myń qazaqstandyqty qabyldady. Ótinishterdiń 96%-i boiynsha oń sheshimge qol jetkizildi, konsýltativtik, quqyqtyq jáne basqa da kómek kórsetildi. Qalǵan 4%-i oryndalýda.
Májilistegi «Nur Otan» Fraktsiiasynyń bastamasymen sailaýaldy mindettemelerdi iske asyrý jónindegi Jol kartasyna sáikes 12 zańnamalyq jáne quqyqtyq akti, onyń ishinde 9 zań qabyldandy. Olardyń qatarynda Ekologiialyq kodeks, inkliýzivtik bilim berý, áleýmettik kásipkerlikti damytý, azamattardyń quqyqtaryn qorǵaýdy kúsheitý jáne basqalary boiynsha ózgerister bar.
Jastar aldyndaǵy sailaýaldy ýádelerdi oryndaý jaiy erekshe baqylaýda. Máselen, 2025 jylǵa deiingi «Jastar – Otanǵa!» baǵdarlamasyn iske asyrý boiynsha 217 jol kartasy aiasynda 35 jasqa deiingi 4,5 millionnan astam jas qazaqstandyqty qamti otyryp, 3,5 myń indikatorǵa qol jetkizý kózdelgen. Negizgi máseleler qatarynda bilim berý sapasyn kóterý, jumysqa ornalastyrý, qoljetimdi baspana, azamattyq belsendilikti keńeitý, tulǵalyq damý jáne bos ýaqyt máseleleri bar.
Elbasynyń «Senim. Dialog. Bolashaqqa nyq qadam» atty partiiany júieli qaita jańǵyrtý baǵdarlamasy aiasynda aimaqtyq ókildi partiia organdarynyń basshylyǵy 40%-ke jańardy. Partiia Ortalyq apparatynyń qurylymy shtat sany 10%-ke qysqartyla otyryp, ońtailandyryldy. Jańa standarttar men qoǵam suranysy eskerile otyryp, sybailas jemqorlyqqa qarsy kúres odan ári kúsheitilýde. Jarǵy men Etika kodeksine sáikes partiia qataryn «tazartý» jalǵastyrylýda.
Qoǵamdyq baqylaýdy kúsheitý, jergilikti jerde enjarlyqty jeńý, depýtattardyń ashyqtyǵyn qamtamasyz etý úshin biyldan bastap alǵash ret barlyq deńgeidegi máslihattardaǵy «Nur Otan» fraktsiialary músheleriniń jariia reitingi engizildi. 1 qyrkúiekten bastap azamattar úshin ashyq qoljetimdi arnaiy internet-platformany iske qosý josparlanyp otyr. Onda halyq qalaýlylarynyń qyzmeti men bastamalary týraly aqparattar, olarǵa tikelei júginý múmkindigi qamtylǵan.
– Táýelsizdik aiasyndaǵy 30 jyl ishinde elimiz ártúrli qiyndyqtar men synaqtardy bastan keshirdi. Áitse de, biz olardy árdaiym eńserip, birligimiz artyp, qýatty bola tústik. Qazirgidei syn-qaterler jaǵdaiynda «Nur Otan»-nyń olardy eńserý boiynsha naqty baǵdarlamalary men quraldary, partiialastary men qoǵam belsendileri, saiasi erik-jigeri men sheshimtal is-qimyly bar. Qazaqstandyqtardyń qoldaýymen «Nur Otan» partiiasy ári qarai da el basshylyǵy mejelegen barlyq jospardyń iske asyrylýyn qamtamasyz etýdi jalǵastyra beredi, – dep túiindedi Baýyrjan Baibek.
