Nur Otan alańynda Memlekettik satyp alý týraly zańǵa ózgerister engizý usynyldy
Jiyna barysynda Keńes múshesi, jýrnalist Mihail Kozachkov Ishki memlekettik aýdit komitetiniń (IMAK) qyzmetine júrgizilgen taldaý birqatar sybailas jemqorlyq táýekelderin anyqtaǵanyn alǵa tartty.
Atap aitqanda, IMAK aýmaqtyq organdary óz ókilettikterin paidalanyp, memlekettik satyp alý qorytyndylarynyń kúshin zańsyz joiǵan. Mundai jaǵdai kóbinese «Memlekettik satyp alý týraly» Zańnyń 152-156-baptary negizinde júrgizilgen.
– Biz zańnyń keibir baptaryna «sonyń ishinde kameraldyq baqylaý» degen sózdi alyp tastai otyryp, ózgerister engizýdi usynamyz. Osylaisha, ótkizilgen konkýrstardyń qorytyndylaryna IMAK-niń aralasýǵa múmkindigi bolmaidy. Sonymen qatar, memlekettik satyp alý qorytyndylarynyń sheshimine shaǵymdardy qaraýdy memlekettik satyp alýdy uiymdastyrýshylarǵa júkteý oryndy dep sanaimyz. Ári qarai uiymdastyrýshynyń sheshimimen kelispegen jaǵdaida ónim jetkizýshi QR Ákimshilik rásimdik-protsestik kodeksi sheńberinde sot organdaryna shaǵymdanýǵa quqyly bolady, – dedi Mihail Kozachkov.
Almaty qalasyndaǵy sybailas jemqorlyqqa qarsy jumys jaǵdaiyn qaraý barysynda Keńes múshesi, Májilis depýtaty Natalia Dementeva bilim berý, jer qatynastary, densaýlyq saqtaý siiaqty salalarda birqatar memlekettik qyzmetterdi avtomattandyrýdyń joqtyǵyna nazar aýdardy.
– Keibir basqarmalar osy ýaqytqa deiin sybailas jemqorlyq táýekelderine ishki taldaý júrgizbegen. Mysaly, 2020 jyly nysandar qurylysy boiynsha memlekettik satyp alý sharttaryn oryndaý kezinde Jaily qalalyq orta basqarmasy 29 mln teńgeden astam somanyń is júzinde oryndalmaǵan jumystaryn qabyldap, qarjysyn tólegen. Sol siiaqty turǵyndardan jii túsetin shaǵymdardyń biri – energotiimdilik jáne infraqurylymdyq damý basqarmasy júrgizgen jumystardan keiin jol jabynyn qalpyna keltirý jáne abattandyrýdyń sapasyz jasalýy, – dep málimdedi Natalia Dementeva.
Onyń aitýynsha, Keńestiń usynymy boiynsha memlekettik qyzmetten bosatylǵan Energotiimdilik jáne infraqurylymdyq damý basqarmasynyń burynǵy basshysy A.Berkimbaev sybailas jemqorlyq táýekelderine qaramastan, «AlmatyJylýKommýnEnergo» JShS direktory bolyp taǵaiyndalǵan.
– A.Berkimbaevtyń jylý berý maýsymyna daiyndyq jumystaryn mardymsyz júrgizýi saldarynan páterlerinde jylý joq «Vostochka» TK turǵyndary mitingige shyqty. Sonymen qatar, A.Berkimbaev atalǵan seriktestiktegi sybailas jemqorlyqqa qarsy sektordyń basshysyn jumystan shyǵaryp, osy laýazymǵa óziniń júrgizýshisin taǵaiyndaǵan, – dep qabaq shytty depýtat.
Sondai-aq, ol Qoǵamdyq densaýlyq saqtaý basqarmasy sybailas jemqorlyqqa qarsy is-qimyl boiynsha atqarylyp jatqan jumystar týraly aqparat berýdi suraǵan Keńes jumys tobynyń ótinishin elemegenin jetkizdi.
Jiyn qorytyndysy boiynsha Keńes Qarjy ministrligine memlekettik satyp alý kezinde sybailas jemqorlyq táýekelderin boldyrmaý maqsatynda tiisti zańǵa ózgerister engizý boiynsha usynystardy qaraýdy jáne Parlamentke engizýdi usyndy.
Almaty qalasynyń basshylyǵyna Keńestiń jumys toby anyqtaǵan kemshilikterdi joiý boiynsha qajetti sharalar qabyldaý usynyldy.
Sonymen qatar, sybailas jemqorlyqtyń aldyn alý boiynsha jumysqa formaldy qaraǵany úshin Qoǵamdyq densaýlyq saqtaý basqarmasynyń basshysy Nariman Tabynbaev pen partiianyń Naýryzbai aýdandyq filialy tóraǵasy, aýdan ákimi Sanjar Toǵaidyń partiialyq jaýapkershiligi qaralatyn bolady.
Sondai-aq, Almaty qalasynyń ákimine Qalalyq jaily orta basqarmasynyń basshysy Sapar Nurashevti tártiptik jaýapkershilikke tartý, al partiianyń qalalyq filialyna «AlmatyJylýKommýnEnergo» JShS-nyń direktory Aidar Berkimbaevty partiia qatarynan shyǵarý usynyldy.
