جيىنا بارىسىندا كەڭەس مۇشەسى، جۋرناليست ميحايل كوزاچكوۆ ىشكى مەملەكەتتىك اۋديت كوميتەتىنىڭ (ىماك) قىزمەتىنە جۇرگىزىلگەن تالداۋ ءبىرقاتار سىبايلاس جەمقورلىق تاۋەكەلدەرىن انىقتاعانىن العا تارتتى.
اتاپ ايتقاندا، ىماك اۋماقتىق ورگاندارى ءوز وكىلەتتىكتەرىن پايدالانىپ، مەملەكەتتىك ساتىپ الۋ قورىتىندىلارىنىڭ كۇشىن زاڭسىز جويعان. مۇنداي جاعداي كوبىنەسە «مەملەكەتتىك ساتىپ الۋ تۋرالى» زاڭنىڭ 152-156-باپتارى نەگىزىندە جۇرگىزىلگەن.
– ءبىز زاڭنىڭ كەيبىر باپتارىنا «سونىڭ ىشىندە كامەرالدىق باقىلاۋ» دەگەن ءسوزدى الىپ تاستاي وتىرىپ، وزگەرىستەر ەنگىزۋدى ۇسىنامىز. وسىلايشا، وتكىزىلگەن كونكۋرستاردىڭ قورىتىندىلارىنا ىماك-نىڭ ارالاسۋعا مۇمكىندىگى بولمايدى. سونىمەن قاتار، مەملەكەتتىك ساتىپ الۋ قورىتىندىلارىنىڭ شەشىمىنە شاعىمداردى قاراۋدى مەملەكەتتىك ساتىپ الۋدى ۇيىمداستىرۋشىلارعا جۇكتەۋ ورىندى دەپ سانايمىز. ءارى قاراي ۇيىمداستىرۋشىنىڭ شەشىمىمەن كەلىسپەگەن جاعدايدا ءونىم جەتكىزۋشى ق ر اكىمشىلىك راسىمدىك-پروسەستىك كودەكسى شەڭبەرىندە سوت ورگاندارىنا شاعىمدانۋعا قۇقىلى بولادى، – دەدى ميحايل كوزاچكوۆ.
الماتى قالاسىنداعى سىبايلاس جەمقورلىققا قارسى جۇمىس جاعدايىن قاراۋ بارىسىندا كەڭەس مۇشەسى، ءماجىلىس دەپۋتاتى ناتاليا دەمەنتيەۆا ءبىلىم بەرۋ، جەر قاتىناستارى، دەنساۋلىق ساقتاۋ سياقتى سالالاردا ءبىرقاتار مەملەكەتتىك قىزمەتتەردى اۆتوماتتاندىرۋدىڭ جوقتىعىنا نازار اۋداردى.
– كەيبىر باسقارمالار وسى ۋاقىتقا دەيىن سىبايلاس جەمقورلىق تاۋەكەلدەرىنە ىشكى تالداۋ جۇرگىزبەگەن. مىسالى، 2020 جىلى نىساندار قۇرىلىسى بويىنشا مەملەكەتتىك ساتىپ الۋ شارتتارىن ورىنداۋ كەزىندە جايلى قالالىق ورتا باسقارماسى 29 ملن تەڭگەدەن استام سومانىڭ ءىس جۇزىندە ورىندالماعان جۇمىستارىن قابىلداپ، قارجىسىن تولەگەن. سول سياقتى تۇرعىنداردان ءجيى تۇسەتىن شاعىمداردىڭ ءبىرى – ەنەرگوتيىمدىلىك جانە ينفراقۇرىلىمدىق دامۋ باسقارماسى جۇرگىزگەن جۇمىستاردان كەيىن جول جابىنىن قالپىنا كەلتىرۋ جانە اباتتاندىرۋدىڭ ساپاسىز جاسالۋى، – دەپ مالىمدەدى ناتاليا دەمەنتيەۆا.
ونىڭ ايتۋىنشا، كەڭەستىڭ ۇسىنىمى بويىنشا مەملەكەتتىك قىزمەتتەن بوساتىلعان ەنەرگوتيىمدىلىك جانە ينفراقۇرىلىمدىق دامۋ باسقارماسىنىڭ بۇرىنعى باسشىسى ا.بەركىمبايەۆ سىبايلاس جەمقورلىق تاۋەكەلدەرىنە قاراماستان، «الماتىجىلۋكوممۋنەنەرگو» ج ش س ديرەكتورى بولىپ تاعايىندالعان.
– ا.بەركىمبايەۆتىڭ جىلۋ بەرۋ ماۋسىمىنا دايىندىق جۇمىستارىن ماردىمسىز جۇرگىزۋى سالدارىنان پاتەرلەرىندە جىلۋ جوق «ۆوستوچكا» تك تۇرعىندارى ميتينگىگە شىقتى. سونىمەن قاتار، ا.بەركىمبايەۆ اتالعان سەرىكتەستىكتەگى سىبايلاس جەمقورلىققا قارسى سەكتوردىڭ باسشىسىن جۇمىستان شىعارىپ، وسى لاۋازىمعا ءوزىنىڭ جۇرگىزۋشىسىن تاعايىنداعان، – دەپ قاباق شىتتى دەپۋتات.
سونداي-اق، ول قوعامدىق دەنساۋلىق ساقتاۋ باسقارماسى سىبايلاس جەمقورلىققا قارسى ءىس-قيمىل بويىنشا اتقارىلىپ جاتقان جۇمىستار تۋرالى اقپارات بەرۋدى سۇراعان كەڭەس جۇمىس توبىنىڭ ءوتىنىشىن ەلەمەگەنىن جەتكىزدى.
جيىن قورىتىندىسى بويىنشا كەڭەس قارجى مينيسترلىگىنە مەملەكەتتىك ساتىپ الۋ كەزىندە سىبايلاس جەمقورلىق تاۋەكەلدەرىن بولدىرماۋ ماقساتىندا ءتيىستى زاڭعا وزگەرىستەر ەنگىزۋ بويىنشا ۇسىنىستاردى قاراۋدى جانە پارلامەنتكە ەنگىزۋدى ۇسىندى.
الماتى قالاسىنىڭ باسشىلىعىنا كەڭەستىڭ جۇمىس توبى انىقتاعان كەمشىلىكتەردى جويۋ بويىنشا قاجەتتى شارالار قابىلداۋ ۇسىنىلدى.
سونىمەن قاتار، سىبايلاس جەمقورلىقتىڭ الدىن الۋ بويىنشا جۇمىسقا فورمالدى قاراعانى ءۇشىن قوعامدىق دەنساۋلىق ساقتاۋ باسقارماسىنىڭ باسشىسى ناريمان تابىنبايەۆ پەن پارتيانىڭ ناۋرىزباي اۋداندىق فيليالى ءتوراعاسى، اۋدان اكىمى سانجار توعايدىڭ پارتيالىق جاۋاپكەرشىلىگى قارالاتىن بولادى.
سونداي-اق، الماتى قالاسىنىڭ اكىمىنە قالالىق جايلى ورتا باسقارماسىنىڭ باسشىسى ساپار نۇراشيەۆتى تارتىپتىك جاۋاپكەرشىلىككە تارتۋ، ال پارتيانىڭ قالالىق فيليالىنا «الماتىجىلۋكوممۋنەنەرگو» جشس-نىڭ ديرەكتورى ايدار بەركىمبايەۆتى پارتيا قاتارىنان شىعارۋ ۇسىنىلدى.
